A decisión foi adoptada tras coñecer o falecemento de José Luis Paz Pena, ex-presidente do comité de empresa, de 75 anos e xa xubilado, pero que nos días anteriores estivera en contacto con varios traballadores
A planta de Alu Ibérica na Coruña (a antiga Alcoa) permanecerá pechada durante 14 días, de forma preventiva, para tentar evitar o contaxio do coronavirus entre os seus traballadores. A decisión foi adoptada este venres pola empresa, despois de coñecer o falecemento polo Covid-19 de José Luis Paz Pena, ex-traballador da planta e ex-presidente do comité de empresa de Aluminios de Galicia (posteriormente Alcoa).
Paz Pena, que tamén foi secretario xeral de CC.OO. na comarca da Coruña, tiña 75 anos e varias patoloxías previas. Por suposto, non traballaba na factoría neste momento, pero si estivo en contacto cun gran número de traballadores nas semanas previas ao seu falecemento. Por exemplo, participou o pasado 11 de marzo na manifestación levada a cabo polo persoal na cidade herculina para esixir medidas máis ambiciosas en relación co Estatuto de Consumidores Electrointensivos.
Non hai aínda ningún positivo por coronavirus entre o persoal da planta, pero por precaución e para evitar contaxios decidiuse a parada total da actividade
Alu Ibérica subliña que de momento non está confirmada a existencia de ningún positivo por coronavirus entre o persoal da planta, pero por precaución e para evitar contaxios decidiuse a parada total da actividade durante un período de 14 días, suficiente para comprobar a aparición de síntomas. Aínda que a produción para, a compañía explica que o subministro aos seus clientes está garantido grazas ao stock dispoñible.
A empresa pediulles a todos os traballadores que tiveron contacto directo co falecido que se poñan en contacto de inmediato co Servizo de Saúde en aplicación do protocolo fronte ao coronavirus establecido na empresa.