Despece

• Feijóo fía a solución ao 'tax lease' a un recurso ao Tribunal de Estrasburgo

  O presidente da Xunta, Alberto Núñez Feijóo, pediu ao Goberno estatal que recorra ante o Tribunal de Estrasburgo a decisión da Comisión Europea que obriga a España a devolver as axudas do tax lease desde 2007 a 2011 e que solicite a "suspensión cautelar" desta determinación, que cualificou de "cuestionable xuridicamente, pouco responsable desde o punto de vista económico e insensible desde o punto de vista social".

  Feijóo cre que esta decisión da CE provoca "danos", aínda que "controlados", ao sector naval galego que apostou por "reverter" con ese recurso a Estrasburgo. Así e todo, instou a comezar  a traballar en medidas fiscais e xurídicas que permitan ao sector construír barcos. O presidente da Xunta defendeu que hai "argumentos xurídicos suficientes para gañar" o recurso.

  O xefe do Executivo galego avanzou que o ministerio e as comunidades implicadas están "a concretar unha folla de ruta" cos investidores e o sector naval, co fin de presentar unha proposta conxunta ante o Ministerio de Facenda e a Axencia Tributaria para buscar "unha solución, a menos mala, para que o impacto sexa o menor posible no futuro do sector naval".

  Feijóo considerou que non é "prudente" concretar neste momento a canto ascende a cantidade que se terá que devolver polas axudas recibidas entre 2007 e 2011. O obxectivo, afirmou, é que "esa devolución sexa a menor posible no contexto da resolución do colexio de comisarios".

  "Hai moito percorrido aí e capacidade para interpretar dunha forma correcta esa resolución e que a devolución sexa moito menor da que inicialmente estaba prevista", apuntou e incidiu en que a intención é que o reintegro desas axudas "sexa compatible coa posibilidade de seguir facendo barcos".

  "Se Estrasburgo acepta a suspensión cautelar, o panorama quedaría resolto durante bastante tempo"

  Así, indicou que traballan na concreción das cantidades e os prazos nos que habería que facer a devolución, aínda que insistiu en que "a primeira proposta" da Xunta é recorrer a resolución porque, se Estrasburgo acepta a suspensión cautelar, quedaría "resolto durante bastante tempo o panorama desde o punto de vista de non ter que devolver cantidade algunha ata que o Tribunal resolva".

  Os argumentos nos que se basea Feijóo para pedir este recurso son os principios de discriminación positiva, de proporcionalidade, seguridade xurídica e inacción. Respecto deste último aspecto lembrou que a denuncia de Holanda presentouse en 2006 pero o expediente a España non se abriu até 2011. "Non nos parece achacable nin ao goberno socialista daquel momento, nin aos estaleiros nin ás comunidades autónomas a inacción da UE", manifestou. "En Francia non se devolveu, en España por que se devolve o que noutros países da UE non se devolveu?", protestou e volveu a rexeitar a decisión da Comisión.

  No plano económico, Feijóo insistiu en que a decisión é "pouco responsable" porque "non se facilita" a industrialización de España e de Europa no naval e ponse ao Estado "máis problemas dos que tiveron outros países cando foron denunciados" polo mesmo motivo.

  Por último, argumentou que é "insensible" desde o punto de vista social porque "afecta a un país que ten o 26% de paro" e a unha industria naval, a española, que xa é "moi pequena como consecuencia das reindustrializacións e quebras".

  

• Xavier Vence pide "insubmisión" ante a devolución do 'tax lease'

  O portavoz nacional do BNG, Xavier Vence insta o Goberno central a mostrarse “insubmiso” contra a decisión de Bruxelas sobre a devolución das axudas concedidas ao sector naval. Para o voceiro nacionalista, a sentenza do Colexio de comisarios é “unha decisión política contra a construción naval galega” que claramente vai en contra dos intereses do noso sector naval, decisión que hai que sumar, dixo, ás realizadas no pasado e que “cercenaron o sector naval galego” condenándoo a unha “prolongada crise”.

  O Bloque insta o Goberno central a que se negue a obrigar a devolver as bonificacións fiscais

  Ante as  políticas  industriais da Comisión europea, Goberno central e Xunta que "destrúen o tecido industrial galego", o portavoz do BNG, ademais de  lamentar o anuncio da devolución do tax lease, reclamou que o Goberno central actúe de “maneira insubmisa” porque está  na súa man facer “unha política intelixente e de insubmisión contra a decisión da Comisión europea”.

  Nesta liña, apostou por outro tipo de políticas industrias e financeiras destinadas a garantir a viabilidade  do sector naval galego.Vence manifestou que só facilitando o investimento e o crédito será posible salvar os sector naval galego. O futuro , afirmou, "depende do sector financeiro cunha banca pública galega, capaz de ofrecer crédito ao sector naval, en condicións competitivas e coas axudas precisas do Goberno central e Xunta de Galiza".

  Na súa opinión, o problema principal está nos sectores holandés e alemán que  copan as carteiras de pedidos do sector naval europeo grazas a créditos baratos, “en Alemaña e Holanda o tipo de xuro sitúase no 4% mentres que nós carecemos de entidades financeiras que concedan créditos as estaleiros” e de acadar un préstamo, está suxeito a un interese do 10 ou 12%, “con ese diferencial, sentenciou, está claro que non podemos ser competitivos”.

  

• Sánchez Presedo advirte que a decisión non responde ás súas "peticións"

  "O sector terá que demostrar a súa fortaleza para saír adiante e pór en valor o novo sistema fiscal que ofrece grandes vantaxes aos investidores tanto no sector naval como no da industria audiovisual, dos transportes ferroviarios ou as enerxías renovables", asegurou o eurodeputado socialista galego, Antolín Sánchez Presedo, tras coñecer o ditame de Bruxelas sobre o tax lease, unha decisión que lamentou. "É evidente que a decisión non responde nin ás miñas peticións nin ás miñas preocupacións", dixo.

  "É evidente que a decisión non responde nin ás miñas peticións nin ás miñas preocupacións"

  "Os investidores se poden gañar diñeiro, farano; se apostaron por un réxime que non contaba coa garantía das autoridades europeas, seguro que o farán agora que contan cun sistema xeneroso e con plenas garantías", engadiu o eurodeputado, que advirte de que "as autoridades españolas son as responsables de executar a decisión e contan cunha marxe de apreciación para avaliar as devolucións realmente procedentes que non é nada despreciable". "Deben actuar urxentemente para que non se frustre a indemnidade de estaleiros e navieros, e así evitar consecuencias indeseadas", engadiu.

  Por último, Sánchez Presedo advertiu que esta situación se podería ter evitado "se as autoridades españolas tivesen notificado o sistema de axudas en 2002 e tomasen en serio un expediente que, desgraciadamente, parecen descubrir hai quince días; aínda que desde o Parlamento Europeo sentimos certa soidade, algúns levamos achegando argumentos desde 2011".

  

• "Debe ser o Goberno español o que asuma a devolución das “axudas ilegais”

  A CIG reclámalle ao Goberno español que "asuma a devolución das axudas concedidas ao sector naval ao amparo do sistema de bonificación fiscal tax lease ao tratarse dunha ferramenta financeira posta a disposición de armadores, estaleiros e estruturadores". Dende a central nacionalista cualifican de “moi mala” a resolución do comisario da Competencia que obriga a reintegrar as “subvencións ilegais” dende abril de 2007 e alertan que deixa o sector “ao borde do abismo”.

  Os traballadores do sector e os representantes sindicais coñeceron a decisión do comisario da Competencia, o español Joaquín Almunia, mentres permanecían pechados no interior dos estaleiros da ría de Vigo, onde se encerraron este martes ao mediodía como medida de presión tras celebrar de asembleas nos distintos centros de traballo.

  Dende a federación do Metal da CIG cualificaron a resolución de “moi mala” e alertaron que deixa o sector ao borde do abismo, polo que “a única saída é que o Goberno español sexa o que asuma a devolución das axudas declaradas ilegais polo Comisión Europea”.

  "O tax lease foi unha ferramenta que o Estado español puxo ao servizo dos estaleiros, estruturadores e armadores e polo tanto ten que facerse responsábel da súa devolución", insiste a CIG, tras exixir ao presidente do Goberno español que "compareza publicamente para avalar o novo sistema de bonificación fiscal para xerar confianza nos armadores, o que permitiría ao sector contar con financiación e ter acceso a novos contratos".

  Finalmente, indicaron que unha vez contén co informe completo sobre o sistema de axudas realizarán unha valoración en profundidade e analizarán a posibilidade de convocar mobilizacións en defensa do sector.

• Yolanda Díaz pide un acordo para "desobedecer un mandato inxusto"

  A Executiva Nacional de EU manifesta que o “golpe mortal” que a decisión da Comisión Europea supón para a comarca de Vigo coloca os gobernos do PP en Galicia e no Estado no papel de “sepultureiros” e o comisario Almunia de “executor” da vítima.

  "Non podemos explicarnos", di Yolanda Díaz, coordinadora nacional de EU, “como ante un problema que leva máis de ano e medio en discusión no ámbito europeo só obtivo un intento de movemento por parte do PP nesta última semana”. "sabendo como é coñecido o importante traballo de presión que os lobbies industriais holandeses e franceses estaban facendo en Bruxelas para destruír o sector naval, especialmente ao galego que supón máis do 40% do naval privado do estado", insiste, tras advertir da "sentenza de morte ao naval" e anunciar que se "recorrerá na rúa, onde o pobo, con ou sen gobernos obedentes do PP". 

  Díaz reclama un "acordo político e social para desobedecer un mandato inxusto"

  Yolanda Díaz advirte da destrución do sector naval de se faceren efectivas as devolucións esixidas pola UE, e reclama un "acordo político e social para desobedecer un mandado radicalmente inxusto: desobediencia para forzar unha rectificación da Comisión Europea".

  EU considera que "non existe alternativa seria para a construcción naval que non implique a axuda e soporte financeiro público" e seguirá defendendo a nacionalización dos estaleiros privatizados. A formación denuncia a "traizón ao naval" da UE coa "complicidade" do PP e chama á "mobilización sostida e á rebelión cidadá contra este tiro de graza".

  Ademais, a coalición anunciou que pedirá unha comparecencia de urxencia do ministro Soria na comisión permanente do Congreso dos Deputados.

  Ademais, Alternativa Galega de Esquerda (AGE) cualifica de “brutal” o ataque da Unión Europea ao naval e di que o seu futuro pasa por facelo público. “Europa está cargando contra un sector que en España non é estratéxico, pero que en Galicia si”, afirma a organización, “e os sectores económicos estratéxicos deben estar sempre en mans públicas”.