Afectados galegos denuncian na UE a "estafa" das preferentes

Concentración dos afectados polas preferentes na Coruña CC-BY-NC Praza Pública

Os afectados polas preferentes dan un paso máis. Fartos da falta de resposta política e incluso xudicial, as plataformas da Coruña e de Vigo veñen de presentar unha denuncia na UE, a través da Comisión de Peticións do Parlamento Europeo, polo que consideran "unha estafa" que sufriron máis de 70.000 persoas en Galicia. Solicitarán a devolución íntegra dos seus cartos e que Bruxelas "abra unha investigación sobre os directivos das caixas galegas" que permitiron esta situación, polo que pedirán tamén que se "depuren responsabilidades políticas e penais" sobre os responsables das antigas entidades de aforro.

Pedirán que se "abra unha investigación sobre os directivos das caixas" e que se "depuren responsabilidades políticas e penais"

Farano a través do europarlamentario de Izquierda Unida, Willy Meyer, vicepresidente da devandita comisión, e co apoio de Alternativa Galega de Esquerda. A súa número dous, Yolanda Díaz, explicou este venres na Coruña un novo paso que está liderado polas plataformas de afectados polas preferentes de Vigo e da cidade herculina, pero na que se anima a outros colectivos galegos e estatais a que se unan a esta denuncia, que provocará que institucións europeas "recollan toda a información necesaria e investiguen o procedemento das preferentes", así como que os afectados "acudan a Bruxelas a explicar directamente e con detalle a estafa que sufriron".

Se a denuncia se admite a trámite, a comisión investigará o procedemento dos preferentes e os afectados contarán o caso no Parlamento Europeo

Será neste vindeiro mes cando a Comisión de Peticións da UE decida se admite a trámite a denuncia -algo moi probable vistos os antecedentes-, o que permitiría incluso que representantes das insititucións europeas acudisen a Galicia a investigar a "fraude" das preferentes.

"A UE segue considerándonos investidores porque ninguén lles explicou que somos aforradores estafados", di a voceira da plataforma da Coruña

Ana Cedeira, voceira da plataforma da Coruña explicou nunha comparecencia ante a prensa que este novo paso pretende que se faga xustiza co que considera "terrorismo financeiro contra a vida humana". "Foi unha trama creada polos banqueiros e apoiada polos gobernantes", asegurou, logo de aclarar que a Unión Europea segue considerando aos afectados "investidores" porque "ninguén lles foi explicar que somos aforradores estafados". Agora saberano.

"É un drama humano, roubáronnos a vida"

Cedeira explicou que a solución que lle achega agora a clase política é "que perdamos o 70% ou 80% dos nosos cartos". "O único pecado que cometemos os afectados foi confiar nos empregados das caixas que, malia as ameazas dos seus xefes, demostraron non ter ética nin moral", dixo con contundencia. "É un drama humano porque a moitos quitáronlles os aforros de toda a vida, roubáronlles a vida", rematou a voceira da plataforma da Coruña, que advertiu das consecuencias que terían unha solución desfavorable para os afectados. "Hai quen xa dixo que lle daba igual ir ao cárcere que ao cemiterio; están dispostos a todo", finalizou.

 

Manifestación dos afectados polas preferentes en Santiago Dominio Público @ivanformigueiro

Despece

  • A CIG denuncia que o Banco de España foi "cómplice" dos ex directivos de NCG

    A CIG denunciou este venres que o Banco de España foi "cómplice" dos ex directivos do Novacaixagalicia (NCG) que se atribuíron cuantiosas indemnizacións ao abandonar os seus cargos. As críticas da central nacionalista chegan tras o inicio esta semana na Audiencia Nacional da vista oral contra varios exdirectivos das antigas caixas de aforro galegas Caixa Galicia e Caixanova, imputados por cobrar millonarias indemnizacións tras deixar os seus cargos a pesar da crítica situación financeira das entidades.

    Nun comunicado, a CIG subliña que en outubro do ano pasado presentou unha denuncia sobre tales indemnizacións que levou á Fiscalía Anticorrupción a abrir unha investigación que desembocou agora nese xuízo.

    Engade que, paralelamente, tamén presentou unha denuncia ante o Banco de España para que abrise un expediente contra os exdirectivos, pero que "non foi atendida", polo que considera que iso evidencia a súa "total complicidade coas cúpulas directivas das entidades financeiras" galegas.

    "Non só é criticable a actuación do Banco de España, un organismo que sempre destacou como defensor de recortes laborais e sociais, senón tamén da Xunta, que tiña capacidade sancionadora conforme á lei de caixas de aforros aprobada no Parlamento de Galicia, e do Goberno central, que tiña pleno coñecemento das actuacións e situación da entidade", engade a CIG.

    O sindicato considera "positiva" a investigación xudicial en curso, pero solicita que se estenda a "outros exdirectivos e os seus familiares" por percibir tamén indemnizacións multimillonarias".

    O sindicato considera que o actual presidente do Goberno autonómico e candidato á reelección nos comicios do próximo domingo, Alberto Núñez Feijóo, "puxo en perigo miles de postos de traballo", xa que no pasado "repetiu insistentemente que Novacaixagalicia era solvente" e "agora argumenta o mesmo sobre a situación financeira da Xunta".

  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza