Os sindicatos CIG e ELA denuncian por prevaricación ante o Tribunal Supremo ao presidente do Goberno, Mariano Rajoy, e aos seus predecesores, Rodríguez Zapatero e Aznar, por consideralos responsables "do maior saqueo" de España. Na denuncia, que xa fora adiantada por Praza, inclúese tamén a Rodrigo Rato, Pedro Solbes, Elena Salgado, Luis de Guindos, o gobernador saínte do Banco de España, Miguel Ángel Fernández Ordóñez, e o seu antecesor, Jaime Caruana.
"Son responsables de permitir que o poder financeiro controlase a política e os medios de comunicación"
O secretario xeral de ELA, Adolfo Muñoz, Txiki, asegurou que consideran estas persoas responsables "por acción ou omisión" de consentir que o poder finaceiro acabase controlando o Estado. "O control da política, dos medios de comunicación para que as cousas pasen sen que haxa contestación na rúa", asegura.
"Hai que esixir que vaian á cadea os principais culpables da crise", reclama Suso Seixo
Suso Seixo, secretario xeral da CIG, cre que "hai que esixir que realmente vaian á cadea os principais culpables da crise económica". Ademais, critica que o poder xudicial utilixe unha vara de medir diferente cando se trata de delitos económicos á hora de esixir responsabilidades a quen ocupa cargos políticos e económicos.
