Galicia destruíu case 40.000 empregos no pasado ano

En defensa do emprego CC-BY Susete

Galicia suma 277.800 parados e conta con 38.600 ocupados menos e 400 desempregados máis que hai un ano. Esa é a realidade laboral que reflicte a Enquisa de Poboación Activa (EPA) feita pública esta mañá polo INE e que revela de novo o mal comportamento do emprego no país, que segue a sufrir os rigores da crise e que continúa a ver como milleiros de persoas emigran na busca dun futuro mellor fóra da terra.

A destrución é máis que importante, xa que Galicia perdeu 38.200 empregos en 2013, sendo a terceira comunidade que máis destruíu nun ano (-3,77%), pero tamén no último trimestre, ao rexistrar 18.900 ocupados menos (-1,88%), malia que o incremento do paro no mesmo período -do 0,27%- é de 800 persoas. 18.100 activos menos nos últimos tres meses.

Xa que logo, en Galicia hai menos dun millón de ocupados (987.300), que sosteñen máis dun millón de  persoas entre os desempregados e os pensionistas. Por provincias, a destrución de emprego en Galicia concentrouse na da Coruña (-26.200). En Pontevedra, os ocupados caeron en 5.600 persoas, en Lugo en 4.300 e en Ourense en 2.600.

Así, a taxa de actividade alcanza en Galicia o 54,32%, a segunda máis baixa por comunidades autónomas, unicamente por riba da de Asturias (52,04%). Son, en total, 2.329.000 galegos de 16 anos en diante, dos que 1.265.100 son activos, un 2,93% menos que ao peche de 2012 (-38.200 menos). Destes, 277.800 están desempregados e 987.300, ocupados.

Do plus de resistencia ou do diferencial positivo do que adoitaba presumir a Xunta xa non queda nada. Mentres en Galicia volveu subir o paro en 2013 (+0,16%), o paro descendeu en 69.000 persoas no conxunto do Estado (-1,16%), aínda que se destruíron 198.900 empregos, unha situación semellante en todos os territorios. Hai menos paro, pero moito menos emprego. No país, nin tan sequera iso. Hai algo máis de paro e tamén hai moitísimo menos traballo. A xente abandona o mercado laboral ou decide emigrar.

Dos 277.800 milleiros de parados galegos, 184.600 son homes e 129.200 son mulleres, sendo a taxa de actividade entre os homes do 60% fronte ao 49,1% das mulleres, e a de paro, tamén maior no xénero feminino (22,3%) que no masculino (22%).

En canto aos fogares con todos os seus membros en paro, en Galicia hai 92.800 vivendas nas que todos os activos están en situación de desemprego, 3.600 máis que no trimestre pasado e 900 máis que hai un ano. No conxunto do Estado, a cifra medrou en 24.600 no último trimestre, até sumar un total de 1.832.300 fogares neste desesperante contexto.

Emprego precario e temporal

Se debullamos os datos do conxunto do Estado, decatámonos de que a reforma laboral do Goberno e a súa teima por potenciara temporalidade está a ter efecto no tipo de empregos que se están creando: as persoas cun posto de traballo a tempo completo baixaron en 218.100, mentres que o número de ocupados a tempo parcial creceu en 153.100. A porcentaxe de persoas que traballan a tempo parcial incrementouse en case un punto porcentual, até o 16,3% dos ocupados.

A destrución de emprego foi maior no sector público que no privado. É unha tendencia que comezou a mediados de 2012 e que se consolidou, alentada polos recortes nas administracións e as novas normas laborais. No último trimestre do ano, o emprego público descendeu en 34.800 persoas, mentres que o privado fíxoo en 30.200. A diferenza acentúase se se considera todo 2013: durante o ano, o emprego público diminuíu un 4,1%, e o privado, un 0,55%.

Só a agricultura creou emprego neto na última parte do ano, mentres que o sector servizos, a construción e a industria reduciron o seu número de persoas ocupadas.

Xente nunha oficina de emprego en Galicia CC-BY-NC-SA CIG

Despece

  • Máis mocidade parada que ocupada

    En Galicia  hai máis mocidade parada que ocupada. Segundo os datos da EPA que debulla o Instituto Galego de Estatística (IGE), a taxa de paro entre os menores de 29 anos sitúase no 38,1%, fronte á do 34,3% de ocupación. No entanto, a situación aínda é peor de ter en conta as cifras do paro xuvenil, e que se refire á poboación activa menor de 25 anos.

    Nese caso, a taxa de paro xuvenil en Galicia sitúase a final de 2013 no 50,7%, fronte ao 47,9% do trimestre anterior e fronte ao 48,4% do último trimestre de 2012. A taxa de ocupación, xa que logo, descende tamén ata o 16,6%, máis de dous puntos porcentuais menos que a de hai un ano (18,8%).

    A taxa de paro xuvenil en Galicia é case cinco puntos menor á da do conxunto do Estado, onde o número de mozos en desemprego descendeu en 40.900 persoas durante o ano pasado.

    Por grupos de idade, os datos do paro dos comprendidos entre 16 e 19, 20 e 24 e 25 e 34 rexistran reducións (-1.400, -1.500 e -8.200, respectivamente), mentres que o resto sumaron parados durante 2013, sobre todo o grupo de máis de 55 anos (+4.900).

  • Os sindicatos piden á Xunta que reaccione ante "a lacra do paro en Galicia"

    Os sindicatos volveron apelar a Xunta para que artelle medidas que acaben coa "lacra" que supoñen os datos do desemprego en Galicia, comunidade que perde calquera diferencial positivo co Estado e que ve na emigración da súa mocidade un dos seus graves problemas alén do elevado paro.

    Así, UGT cualificou de "xarro de auga fría para o mercado laboral galego" as cifras da EPA e asegura que "xa non acepta máis mensaxes triunfalistas" por parte da Xunta e do Goberno central, aos que insta a "asumir responsabilidades" e a que "acepten o fracaso da reforma laboral e arbitren medidas válidas para frear esta lacra".

    Pola súa banda, desde a CIG considérase que a situación é "tremenda" en Galicia. A central nacionalista acusa a Xunta de "ter a súa responsabilidade" no que tamén considera "a lacra do desemprego" no país porque "non fai nada". "Estes estannos a levar á ruína", asegurou na Cadena Ser Miguel Malvico, secretario confederal de Emprego.

    Para CCOO-Galicia, os datos evidencian que se tratou "doutro ano perdido para o emprego no país".  Segundo Maica Bouza, secretaria de Emprego do sindicato, a EPA "demostra o impacto negativo da reforma laboral, que fomentou a substitución de emprego indefinido por eventual e que se traduciu en peores empregos con peores salarios e menos ou ningún dereito a prestacións".

    As políticas que está a aplicar Feijóo "intensifican" en Galicia, segundo CCOO, as receitas de Mariano Rajoy: "provocan perda de emprego, máis paro, desprotección social e, sobre todo, perda de expectativas de poder desenvolver un proxecto de vida no noso país". "O ano 2013 deixa na comunidade galega máis xente sen emprego, máis pobreza e exclusión social, con milleiros de persoas a procuraren un futuro lonxe da súa terra", insiste.

    CCOO pídelle á Xunta que teña a "valentía" de explicar esta diferente dinámica do emprego en Galicia respecto do Estado pero, sobre todo, "que teña a vontade política de mudar as políticas que están aplicando con tan malos resultados". Segundo o sindicato, Galicia ten "competencias dabondo" para que non sexa así. "Galicia e os galegos e galegas non merecen padecer esta situación", conclúe Bouza.

    Mobilización da CIG ante unha oficina de emprego CC-BY-NC-SA CIG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza