Galicia lidera o descenso do paro en xullo pero tamén o aumento da temporalidade

Vista dunha oficina de emprego CC-BY-NC-SA CIG

O paro rexistrado baixou en xullo en 12.031 persoas en Galicia, que lidera o descenso no número de desempregados anotados nas oficinas do Servizo Público de Emprego e que se sitúa nos 240.279 persoas. O descenso é do 4,8% no país con respecto ao mes anterior, superando en moito a baixada no conxunto do Estado (-0,56%), onde o número de desempregados reduciuse en 29.841 ata quedar nos 4.419.860.

Galicia lidera o descenso no número de desempregados rexistrados ao baixar en 12.031 persoas

As contratacións no verán en Galicia provocan que o descenso intermensual no país sexa o maior no conxunto do Estado en números absolutos e o segundo mellor en termpos porcentuais, mentres que en comparación con 2013, Galicia é a sexta comunidade en descenso do paro rexistrado en número absoluto e o cuarto en porcentaxe. Pero case todos estes bos datos teñen cadanseus datos negativos, xa que o país lidera no mes de xullo o incremento de contratos temporais, moi por riba da medida estatal.

As provincias da Coruña e Pontevedra destacan na redución de desemprego xeral que se deu en 39 territorios do Estado, con 4.116 e 5.022 parados rexistrados menos, segundo os datos feitos públicos este luns. En Lugo baixa en 1.556 e en Ourense en 1.337. Galicia conta, xa que logo, con 20.823 parados rexistrados menos que hai un ano.

O número de contratos temporais incrementouse en Galicia nun 25,17%, o maior incremento do Estado

Pero estes datos positivos van sempre acompañados -e inevitablemente nesta crise- doutros negativos. É tamén o caso de Galicia, que á vez que lidera en xullo o descenso no número de desempregados tamén lidera o aumento da temporalidade nos contratos. Así, mentres os contratos indefinidos se incrementan en Galicia tan só nun 1,2% no pasado mes (un dos peores datos entre as autonomías), os temporais aumentan un 25,17%, sendo este incremento o maior no conxunto do Estado e moi afastado da seguinte maior suba, a de Cataluña (+20,4%). Tan só o 6% da contratación rexistrada en xullo é de carácter indefinido

Con respecto a hai un ano, o número de contratos indefinidos medrou no Estado un 18,4%, fronte ao 13,8% de Galicia, o terceiro peor dato por autonomía exceptuando Ceuta e Melilla.

Ademais, a Seguridade Social gañou en xullo en Galicia unha media de 14.421 afiliados (+1,56%) e 8.992 con respecto ao mesmo mes do ano anterior. Así, o número de cotizantes queda agora nas 936.088 persoas.

 

Datos no Estado

O descenso do paro no Estado é un bo dato, pero a caída é inferior á rexistrada en xullo do pasado ano, de case 65.000 persoas, e tamén ao descenso de máis de 122.000 no pasado mes de xuño. En España, o paro reduciuse en case 290.000 persoas (-5,94%) no último ano, aínda que en termos desestacionalizadios, o paro medrou en xullo en 32.537 desempregados, un dato que, segundo o Ministerio de Emprego, correspóndese coa tendencia da serie histórica.

Ademais, o número de parados rexistrados é menor ao que había cando Mariano Rajoy chegou ao Goberno, pero, non obstante, o número de afiliacións á Seguridade Social é medio millón inferior.

Hai que ter en conta que o paro rexistrado só mide as persoas que están apuntadas ás oficinas de emprego (e que, polo tanto, teñen algún incentivo para facelo, como cobrar unha prestación) e que éa Enquisa de Poboación de Activa a que mide con máis exactitude a situación do mercado de traballo. Precisamente, a EPA mostrou unha forte caída da poboación activa nos últimos dous anos, é dicir, que España perde poboación en disposición de traballar.

Desde que Rajoy chegou ao Goberno, perdéronse no Estado medio millón de ocupados

Doutra banda, é a afiliación á Seguridade Social a que mostra cal é a evolución do emprego. E esa evolución mostra que desde que Rajoy chegou á presidencia do Goberno perdéronse medio millón de ocupados: en novembro de 2011 había 17.248.530 persoas con emprego, mentres que agora hai 16.747.103. Foron varias as ocasións nas que o paro descendía con forza un mes, pero a afiliación crecía debilmente. Esta contradición mostraba que había pesonas que estaban a abandonar o desemprego, pero non para incorporarse a un posto de traballo.

A conselleira de Traballo saúda un participante nun obradoiro de formación © Xunta

Despece

  • O mercado laboral sofre "un abandono sen precedentes" en Galicia

    Os sindicatos advirten da precariedade do mercado laboral galego malia a importante baixada do número de desempregados rexistrados en Galicia.

    Para Comisións, os datos do paro rexistrado nas oficinas do Servizo Público de Emprego no mes de xullo son a constatación de que se produce "un abandono sen precedentes" do mercado laboral galego. Os datos poñen de relevo, ademais, que a mellora do emprego é claramente estacional", di a secretaria de Emprego do sindicato, Maica Bouza, que destaca que os postos de traballo que se crearon son "de carácter temporal, ao tempo que dous terzos da redución do paro se concentran sector dos servizos".

    "Hai un feito histórico negativo en Galicia: hai máis persoas con subsidios de desemprego que prestacións contributivas"

    Ademais, CCOO repara no feito de que a evolución da afiliación "evidencia menor duración dos contratos e menores xornadas de traballo". "Mellora do emprego, si, pero con data de caducidade, á custa de dereitos e de perda de calidade", denuncia Bouza, que denuncia "máis pobreza" e que revela que desde hai un mes hai "un feito histórico desgrazadamente negativo en Galicia: hai máis persoas percibindo subsidios por desemprego que prestacións contributivas".

    "A crise, a reforma laboral e a falta de vontade política de mudar o modelo económico actual —orientado ao beneficio dunhas poucas persoas— está conseguindo os seus obxectivos: o incremento das desigualdades, a xeneralización da pobreza e a volta á emigración", denuncia Bouza, que pide á Xunta que "non siga de costas á realidade" e que active políticas que "aposten pola recuperaicón e o emprego e incrementen a protección social e a saída dos galegos por falta de expectativas".

    "As cifras confirman a mentira de que esteamos nunha etapa de crecemento""

    Por outra banda, para a CIG os datos do paro rexistrado "confirman a mentira de que  esteamos nunha etapa de crecemento". "O descenso é debido á estacionalidade e á emigración; a precariedade e a temporalidade medran de xeito imparábel, e dos 91.604 contratos asinados, tan só 5.466 se fixeron baixo algunha das modalidades de contratación indefinida en vigor", lembra o sindicato nacionalista.

    "O mercado laboral galego é totalmente dependente da conxuntura estival"

    O secretario de Organización da CIG, Paulo Carril,  cre que as cifras “confirman o fracaso das políticas económicas e laborais do PP, e o deixamento de funcións e pregamento do Goberno de Feijoo ás directrices do Goberno español, tal e como demostra o feito de que as empresas continúen a executar EREs e a realizar despedimentos masivos (aí están os  casos de Atento ou  Siemsa-GES), ao tempo que asistimos na Galiza ao desmantelamento de sectores industriais e económicos básicos para a creación de emprego de cualidade e estábel. É dicir, máis paro,  máis emigración, máis precariedade e máis pobreza”.

    UGT-Galicia, pola súa banda, cre que os datos de xullo son "bastante bos a primeira vista", pero insiste tamén en queconfiguran "un mercado laboral totalmente dependente da conxuntura estival" e "amosan moitas eivas: a forte contracción na poboación en idade de traballar, o predominio da contratación temporal sobre a indefinida (precariedade sobre calidade do emprego), a acusada baixado do número de perceptores de prestacións e o feito de que o número de afiliados á Seguridade Social continúe por debaixo do millón".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza