Despece

• O 42% dos desempregados en Galicia non cobra prestación ningunha

  A CIG lembra que os 267.812 persoas desempregadas en Galicia son en realidade 285.196 "se se inclúen o total de demandantes de emprego non ocupados (Denos) que, aínda sendo parados, están realizando, por exemplo, un curso de formación e, polo tanto, non se computan". A central nacionalista considera nun comunicado que os datos son "alarmantes", máis tendo en conta que un 42,1% das persoas desempregadas non están cobrando prestación ningunha. "O panorama é desolador e o perigo de exclusión social e pobreza de milleiros de galegos é cada vez maior", di.

  Máis do 90% dos contratos asinados foron temporais

  A CIG destaca tamén o aumento de contratos rexistrados, un total de 69.540, un 14,08% máis que no mes de setembro e un 21,72% de incremento interanual. Tendo qen conta que diminuíu o número de persoas ocupadas, o dato "siginfica que se incrementou de forma moi relevante a rotación e, en consecuencia a precariedade laboral". De feito, só o 8,54% dos contratos realizados foron indefinidos, fronte o 91,5% temporais.

  A isto hai que engadir que do total de persoas desempregadas só 150.374 cobran algún tipo de prestación, sexa esta contributiva, subsidio, renda de inserción activa ou subsidio de eventuais agrarios. De aí tírase que un 42,1% de persoas desempregadas en Galicia non perciben ningún ingreso, o que aboca a unha cada vez maior porcentaxe de poboación á pobreza e a exclusión social.

  Para o secretario confederal de Emprego e Industria, Antonio López Rivera, esta situación pon de manifesto a “inutilidade” da reforma laboral para crear emprego, “moi ao contrario, o único que está a favorecer é o incremento constante do paro e a xerar unha alarmante precariedade laboral”.

• "O oasis de beleza era un dato estacional"

  Comisións Obreiras acollen os últimos datos do desemprego como a confirmación de todos os seus temores. Para a responsables do sindicato en materia laboral, Maica Bouza, fica demostrado que o "oasis de bondade e beleza" presentado dende os Gobernos galego e central durante o verán "respondía a un dato estacional" pero a radiografía de outubro "confirma a realidade do desemprego, terriblemente preocupante".

  O paro "medra en todos os sectores" e só se rebaixa nun colectivo, o das persoas "sen emprego anterior" pero neste caso, advirte Bouza, non cabe unha lectura positiva, tampouco neste sentido. Ben ao contrario, di, esa baixada responde a que hai un volume crecente de persoas paradas de longa duración que "se desaniman e se borran dos rexistros dos servizos públicos de emprego". Neste contexto, e ante as declaracións procedentes da Xunta sobre a aposta de crear emprego en 2015, a responsable de CCOO insta a Feijóo a "que se aclare", xa que se pretende crear emprego debe "poñer enriba da mesa políticas distintas" ás aplicadas durante o seu primeiro mandato.

• A emigración dos mozos impide que a sangría do paro sexa maior en Galicia

  UGT-Galicia considera que os datos do desemprego evidencian que "as consecuencias dunha reforma laboral inútil e lesiva se están deixando sentir, sobre todo, polas fórmulas de despedimento fácil e barato impostas con esta reforma". Para o sindicato, outro dos datos máis significativos que se pode extraer das estatísticas facilitadas polo Estado é o descenso do paro entre os máis mozos, cifrado no 0,6%, e cunha evolución interanual tamén en descenso, cunha baixada do 3,15%, "o que significa que a emigración dos máis mozos está a impedir que a sangría do desemprego sexa aínda maior en Galicia".

  "Os datos do paro xustifican maís que nunca a folga xeral do 14 de novembro"

  "Os datos do Inem xustifican, máis que nunca, a folga xeral convocada para o 14 de novembro co fin de que as administracións que teñen responsabilidades en materia de emprego reaccionen xa porque, de non facelo, a sangría continuará", di UGT nun comunicado no que insiste en qeu "o fluxo da emigración entre os máis mozos obrigados pola falta de oportunidades para atopar un posto de traballo no seu país".

  En canto ás coberturas, UGT destaca que en Galicia hai en setembro de 2012 un total de 150.374 beneficiarios de prestacións por desemprego, a fortísima caída da taxa de cobertura está no 63,81%. "Tamén hai que resaltar que 117.418 galegos que están en situacion de búsqueda de emprego non percibe ningún tipo de prestación, o que aumenta cada día que pasa os riscos de exclusión para miles de galegos", lembra.

• A Xunta ve "negativo" o dato do paro pero presume dunha suba menor que anteriores

  A directora xeral de Formación e Colocación da Xunta, Ana María Díaz López, cualificou es luns de "negativo" o dato do paro en Galicia, pero lembrou que outubro é un mes onde se rexistran tradicionalmente incrementos do desemprego. Con todo, precisou que este aumento mensual –en termos relativos- "é o máis baixo rexistrado nun mes de outubro desde 2006".

  A responsable desta área autonómica destacou que a evolución interanual é mellor que a rexistrada na media do Estado. En Galicia, este aumento foi do 10,6%, dúas décimas por debaixo da media estatal (+10,84%), aínda que non dixo nada sobre o incremento con respecto ao mes pasado, que foi superior á media do conxunto do Estado.

  Se se analizan os datos de desemprego en Galicia por sectores, obsérvase que o sector servizos é o que acumula unha maior subida (+ 6.479 parados), debido ao remate definitivo dos contratos da tempada estival. A continuación sitúase a agricultura e a pesca (+1.723 desempregados); a construción (425 máis) e a industria (+361). Pola súa banda, o número de parados rexistra un descenso no colectivo sen emprego anterior (-549).

  Tal e como lembra tamén a Xunta, no mes de outubro rexistráronse en Galicia un total de 69.540 contratos, 8.583 contratos máis que no mes anterior; deste total, 5.939 foron indefinidos (8,5%) e 63.601 temporais (91,46%).

• "Confirman a ineficacia da reforma laboral e da Xunta"

  O medre do paro en Galicia no pasado mes de outubro é para o PSdeG unha nova "consecuencia" da "nefasta política de emprego da Xunta" que, din a súa voceira en materia económica, Carmen Gallego, logrou "agravar a reforma laboral" e a "política de recortes de Rajoy". Para os socialistas as cifras coñecidas este luns son mostra de dúas "ineficacias", a da devandita reforma e a do propio Goberno galego, polo que a "primeira medida activa contra o desemprego" por parte do novo Goberno do PP debera ser unha "fonda reforma do seu equipo económico e de emprego".

  Isto acontece despois de catro anos nos que, a xuízo de Gallego, a Xunta mantivo "unha actitude de brazos caídos". Mentres, o PSdeG, di, ten unha "especial preocupación" polos desempregados que non perciben ningunha prestación, "máis de 117.000 galegas e galegos en risco de eclusión social". "Mentres, Mato e Feijóo miran para outr lado e até se gaban da súa xestión ofrecendo unha lectura interesada e retorcida dos datos". Neste contexto, os socialistas ven "lóxica" a "chamada sindical a unha xornada de folga xeral" e por iso a Executiva do PSdeG "elevará ao Comité Nacional unha petición de apoio" á convocatoria do 14-N.