Despece

• Hai 93.000 fogares galegos con todos os seus membros en paro

  O número de fogares galegos con todos os seus membros en paro alcanzou os 93.000 no primeiro trimestre do ano, o que supón un aumento do 1,2% en relación ao trimestre anterior e do 12,3% se se compara co tres primeiros meses de 2012, de acordo cos datos da Enquisa de Poboación Activa (EPA) proporcionados polo Instituto Galego de Estatística (IGE).

  Así, os fogares con polo menos un membro activo e nos que todos os membros están en paro pasaron de 82.800 hai un ano aos 93.000 que hai na actualidade. Por provincias, na Coruña son 36.600 os fogares con todos os seus membros desempregados; mentres que en Lugo son 9.500; en Ourense, 11.400; e en Pontevedra, 35.500.

  Hai 33.000 fogares en Galicia nos que non entran ingresos, un 12,6% máis que no anterior trimestre

  Ademiais, hai 33.000 fogares en Galicia nos que ningún dos seus membros percibe ingresos, o que supón un aumento do 12,6% en relación ao tres meses anteriores. A porcentaxe elévase até o 32,5% na comparación co primeiro trimestre de 2012, cando este tipo de fogares eran 24.900.

  O paro na mocidade

  A taxa de paro dos menores de 25 anos elevouse até o 50,6% en Galicia (era do 48,4% no trimestre anterior). Entre as mulleres é do 52,4% e entre os homes, do 49,1%. Os datos reflicten que a taxa de actividade é do 34,4% entre os menores de 25 anos galegos e a de ocupación sitúase só no 17%.

  O paro entre a mocidade alcanza unha taxa do 50,6%

  Ademais, os galegos que teñen entre 25 e 29 anos de idade soportan unha taxa de paro do 32,5% (ante o 29,4% o trimestre anterior). Neste caso, o desemprego déixase notar máis entre os homes (34,7%) que entre as mulleres (30,3%). Os datos da EPA mostran tamén que, entre os mozos menores de 25 anos que teñen traballo (un total de 32.400), o 65% ten un contrato temporal e o 35% teno indefinido.

  

• "Os datos constatan un panorama desolador"

  A secretaria de Emprego de CCOO de Galicia, Maica Bouza, cre que os datos da EPA son a constatación do "panorama desolador" dunha economía en recesión. Na súa opinión, mentres non varíen as políticas económicas da Xunta e do Goberno central, a situación non mellorará, senón todo o contrario: "as medidas de axuste provocarán máis paro, máis pobreza e maior exclusión social".

  Por esta razón, CCOO advirte de que "seguirá a reivindicar, fronte aos recortes, políticas de reactivación da economía, xa que só o crecemento económico poderá reactivar o emprego".

  Comisións alerta de que por primeira vez en varios anos a ocupación por baixo do millón de persoas (998.500). Ademais, "cómpre sinalar outra cuestión: no primeiro trimestre do ano destruíronse 27.400 empregos, pero o paro só aumentou en 10.000, o que revela que hai preto de 17.000 persoas que abandonaron a actividade, que non teñen perspectivas de atopar emprego".

  CCOO sinala outro dato negativo: a perda de emprego no primeiro trimestre dáse en todos os sectores de actividade, especialmente nos servizos (14.000 empregos menos), no sector primario (7.000), na industria (5.000) e na construción (1.600 construción).

• Máis de 300 empregos perdidos ao día

  A CIG destaca que nun só trimestre destruíronse en Galicia 27.500 postos de traballo, pasando de 1.026.000 ocupados no último trimestre de 2012 a 998.000 no primeiro trimestre de 2013. Perdéronse 305 postos de traballo ao día nos tres últimos meses. Esta cifra, "evidencia a dramática situación do emprego, aínda é máis grave se a comparamos co mesmo trimestre do ano pasado". Nese caso o descenso da ocupación é de 52.000 persoas menos. Deste xeito, o número de persoas desempregadas é de 287.400, alcanzando a taxa de paro o 22,3%.

  Os datos son para a CIG, no seu conxunto, demoledores. “Evidencian o estrepitoso fracaso das políticas do partido Popular, que están a provocar a destrución do noso tecido produtivo e a expulsión de miles de persoas do mercado laboral”, sinala Antonio López Rivera, secretario confederal de Emprego e Industria.

  López Rivera salienta que lonxe de ralentizarse, a destrución de emprego "acelerouse no último trimestre", xa que mentres que a caída da ocupación interanual foi do 5%, a trimestral foi do 2,7%. É dicir, máis da metade dos postos destruídos nun ano correspóndense co último trimestre.

  Con todo, e alén do incremento en máis de 8 puntos da taxa de paro entre a poboación de 16 a 24 anos, hai dous elementos que, para a central nacionalista, son "especialmente alarmantes". Mentres que a caída da ocupación é de 27.000 persoas, o paro só se incrementa en 10.000. “A única explicación posíbel é que a maioría desas persoas optaran por emigrar e cremos que outra porcentaxe importante sexa de mulleres que ao perder o emprego decidiron regresar as súas casas desistindo de buscar emprego ante a falta absoluta de expectativas”, di López Rivera.

• "É necesario un cambio de rumbo"

  Para UGT-Galicia, é evidente que "nin o Goberno central nin o da Xunta poden seguir mirando cara outro lado e continuar na senda de implementar políticas de axuste inútiles, estériles e, ademais, moi dañinas para o conxunto da sociedade". O sindicato destaca que se pasou dun déficit público en maio de 2010, cando comeza a senda da perdición, do 11,2% e cunha taxa de paro do 20% a un déficit do 10,6% a finais de 2012 e unha taxa de desemprego do 26% (datos estatais). "Esta taxa de conversión entre redución do déficit e aumento do paro é unha taxa inxusta, irracional e brutal que, á súa vez, evidencia que non se resolve ningún dos problemas deste país, todo o contrario, se agravan", di.

  "É necesario un cambio de rumbo, non recortar, senón impulsar a contratación e o emprego, lanzando un plan de choque sobre o emprego no que participen todos os poderes e interlocutores sociais", reclama UGT, que pide tamén "un plan de estímulo á creación de emprego onde existan máis posibilidades de futuro, buscando os nichos e xacementos de emprego, en sectores da economía verde, en sectores con proxección tecnolóxica, en sectores, en definitiva, onde sexa posible medrar de xeito sostido e equilibrado, con maior valor engadido".

  UGT-Galicia considera, sobre todo á vista das estatísticas ofrecidas hoxe pola EPA, "ineludible o cambio de obxectivos da políticas económicas, recuperando o crecemento e o emprego como eixos fundamentais, basados nunha maior cohesión e igualdade social". O sindicato non acepta que o desemprego, "a rebaixa salarial xeneralizada, o empobrecemento masivo, a exclusión social ou a eliminación de servizos públicos sexa a única política posible fronte á crise".

  Unha vez máis, queda patente que "as políticas de recorte de gasto, se non van acompañadas de estímulo ao crecemento e a creación de emprego, non cumpren sequera cos obxectivos de redución do déficit para as que supostamente se implementan".

• Conde lamenta os datos pero destaca que Galicia "se comporta mellor" que España

  O conselleiro de Economía e Industria, Francisco Conde, recoñeceu que os os datos da EPA sobre Galicia reflicten un "empeoramento do emprego" pero non dubida en destacar o "mellor comportamento" da taxa en Galicia que en España.

  Nunha entrevista na Radio Galega, Conde asegurou que Galicia ten "un comportamento moito mellor" nos indicadores económicos que o Estado. Por iso, avoga por "ter confianza" e subliñou que as medidas impulsadas ante a situación actual "van na boa dirección".

  "É importante xerar confianza entre os investidores e os consumidores", dixo, para avogar, ante "un momento difícil", por "entre todos", incluídos a Xunta, o Estado e os axentes económicos e sociais, "salvar esta situación e reconducir a Galicia cara ao crecemento e creación de emprego".