2014 foi o primeiro ano dende 2007 que se reduciu o número de persoas desempregadas, en Galicia e no conxunto de España. É posible que a destrución de emprego tocara teito, mais as aínda estarrecedoras taxas de paro (21,65% en Galicia, 24,44% no Estado) tardarán aínda moitos anos en regresar -se o fan- aos niveis previos. A situación económica é algo mellor, pero só para unha parte da poboación. En Galicia hai aínda 276 mil persoas desempregadas en idade de traballar e moitas delas son parados e paradas de longa duración.

Este venres publicáronse os datos medios anuais da Enquisa de Poboación Activa, unhas cifras xa coñecidas pero que permiter realizar unha análise máis repousada e lonxe de calquera distorsión estacional. En 2014 o desemprego reduciuse en Galicia en nove mil persoas; porén, segue a aumentar o número de galegos e galegos que levan máis de dous anos buscando un traballo sen conseguilo. Son case 110 mil, fronte ás 100 do ano anterior, ao redor do 40% do total de parados e paradas. En 2009 había en Galicia 23 mil persoas que levaban máis de dous anos no paro, hoxe esa cifra multiplicouse case por cinco.

A eses 110 mil poderíamos sumar outras 54 mil persoas que levan entre 1 e 2 anos no paro, ata facer un total de 164 mil galegos e galegas con máis de 12 meses consecutivos na procura dun emprego que non aparece. Son un dos colectivos que máis está sufrindo nesta crise económica, sen prestacións por desemprego e cunha porcentaxe importante de persoas de máis de 55 anos. De feito, a taxa de paro para os e as maiores de 55 anos en Galicia duplicouse dende o comezo da crise, pasando do 5,6% de 2008 e o 7,2% de 2009 ao actual 15,22%. Ademais, a taxa de cobertura segue a caer, e nestes momentos hai 92.800 fogares en Galicia con todas as persoas activas en situación de desemprego. 

Número medio de galegos e galegas desempregadas e tempo que levan buscando traballo, en miles. Fonte: EPA