O paro cae en Galicia en algo máis de 10.000 persoas en xuño

Oficina de emprego CC-BY Adrián Estévez

O paro rexistrado en Galicia baixou en xuño en 10.452 persoas respecto a maio, situándose así o número total de desempregados no país en 273.434 persoas, un 3,68% menos que o mes anterior. No entanto, e en comparanza co mesmo mes de hai un ano, o paro aumentou en 4.231 persoas, un 1,57% máis, tal e como recollen os datos publicados este martes polo Ministerio de Emprego e Seguridade Social.

O paro descende en todas as provincias galegas, pero a maior caída é no sector servizos polo verán

No conxunto do Estado, o paro rexistrado en xuño descendeu por cuarto mes consecutivo, con 127.248 desempregados menos con respecto a maio, deixando o numero de parados en 4.763.680, un 2,6% menos que en maio. En canto a provincias, nos catro territorios galegos rexistrouse un saldo negativo de parados respecto ao mes anterior, sobre todo na de Pontevedra (-4.536), pero tamén na Coruña (-3.780); Ourense (-1.260); e Lugo (-876).

Galicia foi a cuarta comunidade onde máis descendeu o paro rexistrado, tras Cataluña (24.878 parados menos), Andalucía (-16.442 parados) e Madrid (-14.716), aínda que de novo as cifras, malia ser boas, non dan moitos motivos para o optimismo, xa que xuño é case sempre un mes onde os números dan un respiro. Unha vez máis, e como corresponde á época do ano, a maior caída do desemprego produciuse no sector servizos, onde o número de parados se reduciu en case 7.250 persoas, seguido da construción (-1.281), a industria (-902) ou a agricultura (-320).

Tan só o 6,6% dos novos contratos asinados en xuño en Galicia son indefinidos

A pesar destes bos datos, a contratación, un claro sinal da dinánima do mercado de traballo, segue en negativo. Así, o número de contratos novos fronte ao mesmo mes de 2012 caeu nun 7,87% en España. Esta caída da contratación ten especial incidencia nos indefinidos. En xuño de 2013 só se asinaron 87.349 novos contratos de traballo con esta modalidade, o que apenas representa o 6,84% de todos os contratos (1.277.255). Este dato supón un descenso case o 50% sobre xuño do ano pasado. De feito, os contratos indefinidos rexistrados de xaneiro a xuño son un 18,57% menos que os que houbo de xaneiro a xuño de 2012.

En Galicia, os datos da contratación son aínda peores. En xuño formalizárone no país 59.745 contratos, un 6,12% máis que o mes anterior (3.444 en termos absolutos), pero un 9,85% menos que en xuño de 2012 (6.530 menos). Ademais, do total, 55.794 contratos son de carácter temporal, un 93,4% de todos os asinados no pasado mes, mentres que os indefinidos tan só supoñen un 6,6%. No primeiro semestre, son indefinidos un 8,8% e temporais un 91,2%.

Ademais, os datos do paro rexistrado volven obviar a realidade da emigración, especialmente dos mozos, o que amortigua a suba do desemprego. Máis de 65.000 persoas marcharon de Galicia desde o comezo da crise, concretamente entre 2007 e 2011 segundo os últimos datos do IGE. Malia isto, a taxa de paro non deixou de medrar nese mesmo período. No conxunto do Estado, e malia o descenso do número de parados en máis de 127.000 persoas neste mes de xuño, o número de cotizantes aumentou en só uns 26.800, o que indica que a fuxida cara a outros países segue a ser unha alternativa ou mesmo que moitos desempregados xa non se apuntan no INEM.

Malia todo, a directora xeral de Emprego e Formación da Xunta, Ana María Díaz López, considerou que o dato do paro "é positivo", aínda que apelou á "prudencia" antes de facer valoracións sobre a posibilidade dun cambio de tendencia.

Vista dunha oficina de emprego © Encomun.es

Despece

  • A taxa de cobertura por desemprego cae a niveis mínimos

    Tal e como destaca UGT-Galicia nun comunicado, os datos debullados do paro rexistrado nas oficinas do INEM aclaran que a taxa de cobertura por desemprego en Galicia está en niveis mínimos, no 60,89%, un dato negativo que se une, ademais, a aqueles desempregados sen ningún tipo de axuda, "co forte risco de exclusión social que isto conleva". Alén disto, o sindicato repara en que a contía media da prestación contributiva por desemprego en Galicia é unha das máis baixas do Estado, de 801,8 euros ao mes, "un síntoma máis da precariedade do mercado laboral desta autonomía".

    Por outra banda, entre os máis mozos, os menores de 25 anos, o paro diminúe no mes de xuño nun 9,92% e un 18,1% no ano. Segundo UGT-Galicia, estas cifras non fan máis que demostrar que "un mes máis queda reflectida a saída da mocidade galega cara a fóra na busca de emprego e dun futuro mellor".

    Todos estes datos, unidos á crecente precariedade e temporalidade do escaso emprego creado fanlle concluír ao sindicato que "urxen medidas efectivas e concretas que estimulen a economía e o emprego porque todo é unha constatación evidente do fracaso dunhas políticas basadas no axuste e no recorte". "O estancamento da actividade económica e as negativas perspectivas de creación de emprego provocan a emigración dos recursos humanos e unha descapitalización económica que desemboca no deterioro do nivel de vida, o incremento das desigualdades sociais e o aumento do risco de pobreza e exclusión social", remata.

  • Galicia ten case 30.000 afiliados menos que hai un ano

    A Seguridade Social rexistrou en xuño un incremento medio de 4.843 afiliados en Galicia respecto de maio, un 0,53% máis, co que o total alcanzou os 917.016 cotizantes ao finalizar o mes, de acordo cos datos publicados este martes polo Ministerio de Emprego e Seguridade Social.

    No conxunto do Estado, a Seguridade Social rexistrou nun aumento medio de 26.853 afiliados respecto de maio, un 0,16%, co que o total de ocupados situouse en 16.393.866 cotizantes ao finalizar o mes, a cifra máis alta de ocupación no que vai de 2013. No caso de Galicia, a afiliación descende respecto a xuño de 2012 e en relación a ese mes hai 29.547 afiliados menos (un -3,12%).

  • Máis de cen mil persoas carecen xa de protección por desemprego

    A secretaria de Emprego de CCOO, Maica Bouza, considera "positivo" o descenso do paro por terceiro mes consecutivo, pero matiza que, con respecto ao mesmo mes do ano anterior, Galicia ten 4.231 persoas desempregadas máis e 29.547 persoas menos afiliadas á seguridade social.

    Ademais, Comisións destaca que o descenso do paro rexistrado pode significar tamén "un abandono do mercado laboral, ben por desánimo, suspensión temporal do contrato de traballo ou por asistencia a cursos de formación". Precisamente, o paro rexistrado é, "como o seu nome indica, un rexistro", e, polo tanto, non implica por forza un incremento da ocupación da mesma magnitude. Como proba desta afirmación, Bouza alerta de que no último ano Galicia perdeu case 30.000 persoas afiliadas á Seguridade Social, polo que insta a Xunta a actuar.

    Galicia perdeu no último ano case 30.000 persoas afiliadas á Seguridade Social

    Por outra banda, a caída do desemprego baseouse no incremento de máis de sete puntos da contratación temporal, tanto como descendeu a indefinida. Ao entender da responsable de Emprego de CCOO, este dato "pon en cuestión a consolidación dos empregos que se foron creando".

    Á luz dos datos, Maica Bouza esíxelle á Xunta aprobar de "maneira urxente" as medidas necesarias para converter en estrutural o dato conxuntural de descenso do paro en xuño. Do contrario, Galicia "precisaría vinte e oito meses consecutivos de caída do paro para resolver o seu principal problema", que afecta a máis de 270.000 galegos e galegas.

    "Galicia precisaría 28 meses de caída do paro para resolver o seu principal problema", denuncia CCOO

    Finalmente, Maica Bouza chama a atención sobre os efectos da persistencia da crise e do aumento do paro de longa duración: "máis de cen mil persoas carecen xa de protección por desemprego". Por este motivo, esixe medidas que garantan a protección social, xunto con outras que estimulen a actividade, tales como unha reforma fiscal, incrementar o fluxo de crédito ou o apoio ao tecido produtivo.

  • "As cifras serían máis elevadas de contabilizarse a emigración xuvenil"

    A CIG destaca o descenso do paro en Galicia, pero lembra que se trata de "valores habituais nunha época do ano na que as cifras adoitan ter un mellor comportamento a causa da estacionalidade". "Proba disto é que foi no sector servizos onde mellores resultados se acadaron, cunha baixada do 4,3% en Galiza e do 3% no Estado español"; a continuación situouse a construción, onde descendeu un 2,8% no noso país e un 2,5 no conxunto do Estado; no sector industrial baixou un 2,28 en Galiza e un 2,48% no Estado.

    Para central nacionalista, outro aspecto que confirma que se trata dunha situación conxuntural é o feito de que "a inmensa maioría da contratación foi temporal", xa que só un 6,6% dos 59.745 contratos subscritos foron indefinidos.

    Con todo, dende a CIG fan fincapé en que as preocupantes cifras de desemprego que se rexistran no noso país "serían aínda moito máis elevadas no caso de que se contabilizasen os milleiros e milleiros de mozos e mozas que abandonan Galiza cada ano en busca dun futuro laboral na emigración".

    Ao mesmo tempo, dende a central nacionalista sosteñen que o feito de que a evolución das cifras do paro sexa semellante á de anos anteriores evidencia que "as últimas reformas laborais non están a mudar o comportamento do mercado de traballo".

  • O PP presume dos datos e culpa a Almunia dunha posible subida do desemprego

    A voceira do PPdeG, Paula Prado, destacou que Galicia "reduciu en 60 días case o mesmo número de parados que Almunia ameaza con crear con só premer un botón". Así reaccionaban os populares tras coñecerse os datos do paro, que consideran "unha boa nova" pero que "pode verse ameazada non só por un contexto global de crise senón tamén por decisións arbitrarias como a que ameaza con tomar o comisario con respecto ao tax lease".

    Para Prado, que Almunia "pretenda cebarse con España en xeral e con Galicia en particular" só podería entenderse desde o punto de vista "dunha persoa que queira vingarse nas carnes deses 14.000 empregados do naval polos máis de 1.266.000 votantes que non lle deron o seu voto na comunidade nas eleccións á presidencia do Goberno no ano 2000".

    Segundo a dirixente popular, “a Joaquín Almunia non lle pedimos patriotismo, só xustiza” e que aplique en España as mesmas decisións que adoptou para outros países da Unión Europea, como Francia.

    Como proseguiu Prado, "xerar emprego costa moito no actual contexto pero destruílo moi pouco e con só premer un botón o comisario pode botar po terra os esforzos de todo un país ademais dunha prolongada traxectoria de construción naval en Galicia".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza