O paro rexistrado volve subir en Galicia máis que a media do Estado

Xente nunha oficina de emprego en Galicia CC-BY-NC-SA CIG

Nin recuperación, nin emprego. Os datos do paro rexistrado confirman que haberá que agardar tempo para falar da fin da crise. Ou polo menos que lle pregunten antes aos 281.077 desempregados que hai en Galicia, segundo os datos que se tiran das oficinas dos Servicios Públicos de Emprego en xaneiro. O número de parados subiu en 10.014 persoas no primeiro mes do ano no país, o que supón un incremento do 3,7% respecto do mes anterior, un punto e pico máis que a suba no conxunto do Estado, que foi do 2,4% e que sitúa o número de desempregados rexistrados en 4.814.435. Son 113.097 máis que en decembro, a menor suba desde 2007, dato que xa se encargou de destacar o Goberno central.

Galicia ten 9.700 parados menos que hai un ano pero tamén 10.087 afiliados menos á Seguridade Social

O dato interanual, no entanto, revela que Galicia conta a día de hoxe con 9.713 parados menos que hai un ano, un 3,34% menos, unha caída porcentual idéntica á media estatal, onde hai 166.343 desempregados menos que en xaneiro de 2013. Pero é de novo o dato da afiliación á Seguridade Social o máis preocupante, xa que o país rexistrou unha media de 901.377 afiliados, o que supón 13.249 menos que o mes pasado (-1,45%) e 10.087 menos que hai un ano (-1,18%).

A poboación activa de Galicia xa supón menos dun terzo do número total de habitantes

Xa que logo, en Galicia a poboación activa supón xa menos dun terzo (algo máis do 32%) do total de habitantes do país: 901.377 persoas dos case 2,8 millóns de habitantes.

A diferenza entre o dato do paro e de afiliación non é pequeno: de máis de 3.000 persoas, o que indica que hai máis persoas cuxos postos de traballo desapareceron que persoas que se apuntaron nas oficinas de emprego. Isto pode ser debido a que moitos cidadáns renuncian a apuntarse ao paro -porque xa non o ven útil, teñen dereito a prestación ou porque traballan na economía paralela- ou porque abandonan a busca de emprego. De feito, tanto nos datos de paro rexistrado ultimamente como nos da EPA revélase que Galicia non fai máis que perder poboación activa: a poboación que busca emprego cae, xa sexa porque emigra, deixa o mercado laboral ou volve aos estudos.

O mesmo ocorre no conxunto do Estado, onde a Seguridade Social perdeu 184.031 afiliados en xaneiro con respecto ao mes de decembro, un descenso do 1,13%, o que deixa o número de adscritos ao sistema en 16.173.610 persoas, segundo os datos do Ministerio de Emprego.

Tan só en Estremadura, Euskadi e Asturias subiu o paro máis que en Galicia

 

O paro sobe en todas as provincias

En canto ao número de parados rexistrados, o desemprego sobe en todas as provincias galegas e unicamente en Pontevedra o incremento é menor á media do conxunto do país. A Coruña ten 4.228 parados máis (+4%); Lugo, 1.159 (+4,2%); Ourense, 1.381 (+4,7%) e Pontevedra, 3.246 (+3%). Ademais, Galicia volve situarse entre as comunidades autónomas onde máis sobe o paro neste mes de xaneiro. Tan só en Estremadura (+5,23%), Euskadi (+4%) e Asturias (3,82%) o incremento do desemprego foi maior en termos relativos neste primeiro mes do ano. 

Por sectores, o desemprego sobe en todos eles, pero especialmente en servizos, onde se concentran 8.157 dos novos parados rexistrados, o que indica a destrución de emprego tras a campaña de Nadal no comercio e na hostalería. O paro rexistrado tamén aumenta na agricultura (+79), industria (723), construción (928) e no colectivo sen emprego anterior (+127). Galicia destruíu uns 430 empregos ao día durante o primeiro mes do ano.

O sector servizos encabeza a lista do paro en Galicia, con 169.317 desempregados, seguido da construción (41.376), a industria (39.014) e a agricultura (9.817). Completan os 281.077 desempregados do país os que se inclúen no colectivo sen emprego anterior, e que superan as 21,500 persoas. Ademais, 137.527 dos parados rexistrados son homes e 143.550 mulleres. Máis de 17.500 destes desempregados son menores de 25 anos.

O 91,3% dos contratos asinados en xaneiro en Galicia foron temporais

Por outra banda, en Galicia asináronse 56.245 contratos durante o mes de xaneiro, case 3.500 máis que no mes anterior. Porén, o 91,3% deles foron temporais, fronte aos tan só 4.908 indefinidos.

Exterior dunha oficina de emprego © Encomun.es

Despece

  • Case 200.000 cotizantes menos desde o comezo da crise

    Os sindicatos destacan que os datos do paro volven constatar que "non só non hai nin un só síntoma de recuperación", senón que "medra o paro e hai menos cotizantes". Así o asegura a CIG, que destaca que dos 56.245 contratos asinados, só o 8,7% foron indefinidos, polo que aumentou a porcentaxe da temporalidade e "quen atopa un traballo está en condicións máis precarias e temporal, coa inseguridade e indefensión que iso provoca na clase traballadora".

    "O emprego en Galiza está nunha situación máis que crítica", advirte a CIG

    O sindicato nacionalista destaca que houbo unha perda dun 1,2% de afiliados á Seguridade Social en Galicia, unha perda que se achega aos 200.000 afiliados menos desde que comezou a crise en 2008. Miguel Malvido, secretario confederal de Emprego e Industria denuncia que "o emprego en Galiza está nunha situación máis que crítica", algo que atribúe ao "absoluto fracaso das políticas económicas e laborais emprendidas polo PP". Ademais, considera “alarmantes” as graves consecuencias das reformas laborais que "non só non favorecen a creación de emprego senón que, ademais, están a provocar o empobrecemento masivo da clase traballadora e unha perda de dereitos laborais sen precedentes".

    “É imprescindíbel abordar de inmediato esta situación. Existen outras políticas que si favorecerían a recuperación económica e a creación de emprego.", asegura a CIG.

    UGT-Galicia, pola súa banda, advirte de que "o único que poden facer os gobernos central e galego é poñer enriba da mesa unha folla de ruta con medidas reais e efectivas que atallen xa esta lacra". "Unha lacra, a realidade do mercado laboral galego, que está a facer imposible a recuperación real", din desde o sindicato.

    "Urxe un novo modelo económico e social no que se contemple unha saída da crise máis xusta e solidaria e se asegure un cambio de modelo produtivo e emprego de calidade", insiste.

    Desde CCOO reitérase "a necesidade doutras políticas que aposten pola recuperación da actividade económica e do emprego, incrementen a protección social das persoas en risco de exclusión e eviten a saída de galegos e galegas cara a outros países pola falta de expectativas en Galicia".

    O PPdeG, pola súa banda, recoñece que os datos de xaneiro non son bos, pero celebra que os datos interanuais "confirman a contención da destrución do emprego".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza