O recibo da luz subirá uns 16 euros en Galicia para compensar as eléctricas por pagar impostos

Detalle dunha factura da luz CC-BY-SA Praza Pública

A inminente suba da luz en Galicia para compensar as principais compañías eléctricas por pagaren impostos adicionais no ano 2013 xa ten cifras, e as galegas son as máis avultadas do Estado. O incremento roldará os 16 euros durante un ano, segundo calcula o novo Ministerio para a Transición Ecolóxica, obrigado polo Tribunal Supremo a culminar un incremento no recibo eléctrico que ten a súa orixe en varias decisións do Goberno de Rajoy recorridas polos xigantes do sector ante os tribunais.

Como veu informando Praza.gal, un dos primeiros paquetes de recortes aplicados polo Executivo central do PP en 2012 para "garantir a estabilidade orzamentaria e o fomento da competitividade" converteu en en "obrigatorios" os "suplementos territoriais" no recibo da luz. Isto é, un recargo adicional naquelas comunidades autónomas que aplicasen impostos propios ao abeiro da lei do sector eléctrico do ano 2007. No caso galego estes tributos son o canon de saneamento, o imposto sobre contaminación atmosférica, o imposto sobre o dano medioambiental dos encoros e, sobre todo, o canon eólico creado pola Xunta tras a chegada de Alberto Núñez Feijóo ao poder.

O Goberno de Rajoy mantivo como obrigatorios estes "suplementos territoriais" durante o ano 2013, pero nunca foron cobrados; as eléctricas acudiron aos tribunais e o Supremo deulles a razón

Esta obrigatoriedade foi eliminada apenas un ano despois na nova lei do sector eléctrico e ademais, en 2015, o Tribunal Constitucional considerouna contraria á Carta Magna española. No entanto, o precepto estivera en vigor durante o ano 2013, pero o Goberno central non aplicou nese ano a compensación ás eléctricas polos impostos autonómicos. Varias delas, encabezadas por Gas Natural Fenosa, acudiron á Xustiza e o Tribunal Supremo deulles a razón en 2014. O pasado abril o alto tribunal emitiu un novo auto instando o antigo Ministerio de Enerxía a aplicar xa a suba, á que a Xunta se negara en diversas declaracións políticas.

Contía das compensacións ás eléctricas que se cargarán sobre os recibos da luz CC-BY-SA Praza Pública

As empresas son compensadas, no caso galego, por tributos como o canon eólico ou o imposto sobre o dano medioambiental dos encoros

Dado que, segundo advertiu o Supremo, os responsables do Ministerio poderían ter que asumir consecuencias legais en primeira persoa, o departamento agora dirixido por Teresa Ribera iniciou xa o trámite da orde para "executar integramente as sentenzas". O documento, en trámite de información pública ata finais de agosto, detalla que os gobernos autonómicos xa coñecen o "impacto económico" que esta situación terá "na factura dos consumidores" e que, no caso da Xunta, a Consellería responsable "achegou información" sobre o cobrado polos devanditos impostos.

A suba galega é a máis avultada do Estado

Con esta información sobre a mesa o Ministerio conclúe que o recadado pola Xunta cos impostos ás eléctricas noa no 2013 ascendeu a 34,7 millóns de euros, aos que cómpre engadir 2,97 millóns máis en concepto de xuros polo atraso en compensalas. Resultan así 37,7 millóns de euros, o maior importe do Estado, só semellante ao de Castilla y León, que quedou en 31,2 millóns. Unha vez aplicados todos os criterios que marca a normativa o Ministerio calcula que nunha "factura media anual dun consumidor doméstico", na contorna dos 600 euros, o recargo ascenderá a 15,75 euros para a poboación galega, uns 1,32 euros ao mes.

Neste contexto, o Ministerio admite que a vaga expansiva destas sentenzas xudiciais será diferente en función do punto do Estado que se trate e que, daquela, "os consumidores terán que soportar distinto custo na súa factura en función da comunidade autónoma na que se atopen". Así e todo, matiza, "o impacto será moi reducido" porque está "acoutado no tempo", xa que "a medida só afectou ao ano 2013". As forzas da oposición galega viñeran advertindo de que este incremento se ía producir, mentres que a Xunta se limitou durante meses a reiterar que non compartía a medida e que por iso a recorría.

Parque eólico en Galicia © EGA

Despece

  • O BNG censura que a Xunta "mentise" coa suba da luz: "Grazas ao PP pagaremos a factura máis cara do Estado"

    Presas, en rolda de prensa sobre a suba da luz ditada polo Supremo CC-BY-NC-SA BNG

    D.L.

    "Feijóo non fixo os deberes a tempo, mentiu cando negou que Galiza pagaría" e agora a poboación galega "pagará a factura máis cara do Estado". Así resume a voceira do BNG en materia de Industria e Enerxía, Noa Presas, os efectos que terá no país a orde coa que o Ministerio para a Transición Ecolóxica ten a obriga de canalizar as sentenzas do Supremo que dan a razón ás eléctricas na súa petición de seren compensadas polos impostos cobrados pola Xunta durante o ano 2013, ano no que o Goberno de Mariano Rajoy regulou como obrigatorias estas compensacións.

    "Galiza, unha vez máis, resulta discriminada pola política enerxética imposta dende o Estado polos anteriores gobernos do PP", subliña a parlamentaria ourensá, quen tamén observa responsabilidades na Xunta. O Goberno galego, lamenta Presas, "tardou en recorrer" e negou a suba cando xa era evidente á luz das sentenzas xudiciais. Existiu, cre, unha "falta de interese por iniciar as negociacións" na "busca dunha solución que non prexudicase a Galiza" e agora "constatamos" que a poboación terá que resarcir as grandes eléctricas -o proceso de recurso iniciouno Gas Natural Fenosa- polo cobrado e mais polos xuros. En total, 37,7 millóns de euros.

    Presas (BNG) insta a Feijóo a emprender unha "negociación bilateral" para que sexa o Estado o que asuma o custo dunha mala regulación estatal aplicada en tempos de Rajoy

    Trátase, ao cabo, dun "novo roubo" no que "Galiza é a que máis perde" -a cantidade asignada aos consumidores galegos é a maior- e por iso, cre, a Xunta debera tentar pola vía da "negociación bilateral" que fose o Estado o que asumise as consecuencias dunha mala regulación estatal aplicada e despois derrogada en tempos de Rajoy. O acontecido demostra asemade, ao seu xuízo, que é mentira que exista "unha única tarifa" eléctrica para todos os territorios. Ben ao contrario, di, a diferenza no impacto destas sentenzas no recibo da luz acredita que é posible "unha tarifa eléctrica galega que beneficie empresas e persoas" no país, acorde co feito de ser Galicia fornecedora neta de enerxía eléctrica ao resto do Estado.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza