Os datos esvaecen o diferencial positivo de Galicia no paro, que sobe en 7.500 persoas

Exterior dunha oficina de emprego © Encomun.es

O paro volve subir tras o verán e faino de maneira especial en Galicia, onde suma 7.492 desempregados máis que no mes anterior (+2,87%) e 413 máis que hai un ano (+0,15%), un incremento interanual que se converte en descenso no conxunto do Estado e que serve ao Goberno central para presumir de datos. En España, hai 87.028 parados máis que en setembro (+1,84%) pero o desemprego baixa un -0,46% con respecto a outubro de 2012.

O paro sobe en Galicia máis dun punto máis que no Estado e o descenso interanual de España contrasta co incremento na autonomía

O aumento porcentual do paro no último mes é máis dun punto superior no país que no conxunto do Estado. O diferencial positivo que Galicia mantiña en canto á España esvaécese e a evolución do número de desempregados empeora, máis aló da crecente emigración que tamén se está a cebar especialmente co país. Mentres o paro descendeu en máis de 22.000 persoas no último ano, o primeiro descenso interanual rexistrado desde maio de 2007, o número de desempregados en Galicia medra en máis de 400 cidadáns. Desde o Executivo central xa insisten en destacar que esta baixada interanual contrasta "co forte aumento rexistrado nos meses de outubro ao longo da crise, cunha media de incremento de 557.000 persoas", asegura Fátima Báñez, ministra de Emprego, que tamén destaca que nos dez primeiros meses do ano, o paro reduciuse en máis de 37.000 persoas, "o maior descenso acumulado desde 2006".

Tan só en catro comunidades o incremento do paro é maior que o de Galicia

Xa que logo, en Galicia o número de desempregados inscritos nas oficinas de emprego elévase a case 270.000 persoas (268.225 persoas) e no Estado, a 4.811.383. No caso da comunidade, os datos son especialmente negativos tamén se os comparamos co resto de territorios. Tan só en catro autonomías o incremento do paro é maior que no país: Baleares (+13,93%), Castela-A Mancha (+6,9%), Cantabria (+5,42%) e Aragón (+3,42%).

A Xunta recoñece que os datos son "unha mala noticia" pero aclara que "ao igual que non hai triunfalismo cando baixa" o paro, tamén hai que ser prudentes agora, tal e como dixo o vicepresidente Alfonso Rueda. 

 

Mantense a temporalidade

O final do verán e a estacionalidade dos empregos explican tamén este novo aumento do paro en outubro, superior en Galicia se o comparamos co conxunto do Estado. De feito, dos 7.492 novos desempregados máis que hai no país, máis do 80% sitúanse no sector servizos (6.022), ao tempo que o traballo se destrúe en todos os sectores, agás no da construción, onde cae en 289 persoas. Na industria, o paro aumenta en máis de 1.100 persoas, un dos peores datos dos últimos meses no sector.

Tan só o 7,7% dos contratos rexistrados en Galicia en setembro foron indefinidos

O mes pasado rexistráronse en Galicia 73.423 contratos, o que supón un aumento do 6,25% en relación ao mes anterior e do 5,58% respecto a hai un ano. No entanto, tan só o 7,68% destes contratos son indefinidos, fronte ao 92,32% temporais, polo que a estabilidade non mellora. A evolución é semellante á do conxunto do Estado, onde se rexistraron máis de millón e medio de contratos, un 10,8% máis que hai un ano, e onde o 92,5% dos asinados en setembro foron temporais.

Por provincias, o maior aumento relativo no número de desempregados produciuse en Pontevedra, cun incremento do 4,14% e 4.262 parados maís, fronte ao +2,89% de Lugo (746 parados máis), o +2,54% de Ourense (715 parados máis) e a suba do 1,7% máis da Coruña, onde hai 1.769 desempregados máis que hai un ano. Por sexos, en Galicia hai 128.748 homes en paro, polas 139.477 mulleres.

Galicia tan só conta con pouco máis de 921.000 afiliados á Seguridade Social

En canto á afiliación á Seguridade Social, no Estado rexistrou un aumento medio de 54.927 afiliados respecto ao mes de setembro, un 0,34% máis, co que total de ocupados se sitúa en 16.360.373 cotizantes ao finalizar o mes. En Galicia, a taxa interanual de afiliación media rexistrou o pasaso mes un descenso do -2,51% (superior ao descenso medio estatal do -2,25%), o que supón 23.741 afiliados menos que hai un ano e un número medio de afiliados que se sitúa nos 921.322 persoas.

Mobilización da CIG ante unha oficina de emprego CC-BY-NC-SA CIG

Despece

  • Afiliacións á Seguridade Social

    A Seguridade Social rexistrou en outubro un descenso medio de 4.524 afiliados en Galicia respecto de setembro, un 0,49% menos, co que o total alcanzou os 921.332 cotizantes ao finalizar o mes, segundo os datos publicados este martes polo Ministerio de Emprego e Seguridade Social. En toda España, a Seguridade Social rexistrou en outubro un aumento medio de 54.927 afiliados respecto de setembro, un 0,34% máis, co que o total de ocupados situouse en 16.360.373 cotizantes ao finalizar o mes.

        Galicia perdeu máis de 110.000 afiliados á Seguridade Social en catro anos

    No caso de Galicia a afiliación descende en relación ao mes anterior e tamén con respecto a outubro de 2012. Nos últimos catro anos, desde outubro de 2009, o país perdeu máis de 110.000 afiliados á Seguridade Social.

    En concreto, a comunidade rexistra unha caída media interanual do 2,51%, o que supón a perda de 23.741 afiliados. Por provincias, en relación a setembro, Pontevedra rexistra as maior perdas de afiliados, con 2.911 menos (-0,91%), até situarse en 315.257. Séguenlle Lugo, con 919 menos (-0,79%), até un total de 114.872; Ourense, cunha caída de 470 (-0,47%), que se coloca con 98.553; e A Coruña, con 224 menos (-0,06%), até os 392.650.

    Dos 921.332 afiliados totais en Galicia, un total de 684.526 corresponden ao réxime xeral; mentres que 214.379 son autónomos; e 22.427 están vinculados co réxime do mar. Dentro do réxime xeral, 652.230 persoas correspóndense ao xeneral; 5.043 ao agrario; e 27.252 ao do fogar.

  • Os sindicatos instan a Xunta a "actuar xa" ante unha situación "dramática"

    "O ciclo continúa e tras iniciarse un incremento do desemprego en setembro a situación agudízase en outubro", así resume a CIG a análise dos novos datos do paro feitos públicos este martes polo Ministerio de Emprego. A central nacionalista destaca que "o peor dato é o da evolución interanual, que continúa sumando mes a mes e xa temos un 59,2% máis de desempregados en Galiza que no ano 2008", cando a crise comezou a afectar o emprego no país.

    "Galicia xa ten case un 60% de desempregados máis que en 2008", destaca a CIG

    Ademais, dende a CIG fan fincapé en que as preocupantes cifras de desemprego que se rexistran no país "serían aínda moito máis elevadas no caso de que se contabilizasen os milleiros e milleiros de mozos e mozas que abandonan Galiza cada ano en busca dun futuro laboral na emigración".

    De igual xeito, un informe recente do gabinete técnico de Economía da central nacionalista revela "a grave situación na que se atopan milleiros de familias galegas xa que moitas das persoas que se atopan no desemprego non perciben ningunha prestación". De feito, en agosto de 2013 contabilizáronse no noso país máis de 147.000 persoas en paro sen ningún tipo de prestación.

    "A situación é dramática e hai que actuar xa; non se pode deixar Galicia e a súa xente á deriva", advirte CCOO

    Pola súa banda, Comisións Obreiras (CCOO) insta a Xunta de Galicia a "actuar xa" para solucionar o problema do paro no noso país. En opinión da secretaria de Emprego, Maica Bouza, a situación en Galicia en termos de emprego é "dramática". "A destrución non parece ter fin e mesmo supera a negativa tendencia do Estado; cómpre reverter a situación. Non se pode deixar a Galicia e a súa poboación á deriva", insiste.

    O principal problema de Galicia é o desemprego, que afecta a case trescentas mil persoas, "pero o Goberno de Feijóo mira para outro lado", di Bouza, que critica que Feijóo presente un proxecto de Orzamentos para 2014 que non incorpora medidas que estimulen a recuperación da actividade económica e, con ela, a do emprego. "Recorta os recursos das políticas destinadas a apoiar directamente o emprego en 19 millóns de euros, un 9,6 % menos que o ano anterior", denuncia.

    "Temos máis fogares sen ningún tipo de ingreso que verán agravada a súa situación porque o Goberno central recorta os orzamentos destinados á protección por desemprego nun 5,6 %», critica a secretaria de Emprego de CCOO. Por esta razón, o sindicato insta a Xunta de Galicia a mudar o escenario orzamentario, a non se pregar á "tiranía" de Madrid neste aspecto e aproveitar a tramitación parlamentaria dos Orzamentos do 2014 para incorporar medidas que revertan a situación.

    UGT destaca ademais a taxa de cobertura por desemprego, que en Galicia supera escasamente o 60% (60,15%). "Isto quere dicir que de continuar a tendencia, dentro duns meses, practicamente a metade das persoas que estén en situación de desemprego non terán coberturas", advirte.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza