O persoal de Poligal manifestouse este venres polas rúas de Ferrol para demandar solucións que eviten o peche da fábrica e o despedimento dos seus 120 traballadores e traballadoras. A marcha foi precedida por un peche de 24 horas na Casa do Concello, un encerro que fora acordado o xoves nunha asemblea do cadro de persoal. Na manifestación, que partiu da propia Casa Consistorial e rematou ante a sede da Xunta, participaron tamén empregados e empregas de Navantia, amosando a ligazón que une a Poligal coa industria naval, pois a factoría naronesa naceu ao abeiro das axudas para a reconversión industrial da comarca.
Na manifestación participaron tamén empregados e empregdas de Navantia, amosando a ligazón que une a Poligal coa industria naval
Os traballadores subliñaron a súa "decepción" co Goberno central, trala xuntanza que este xoves mantiveron na sede do Ministerio de Industria. O Executivo anunciara unha xuntanza a tres bandas (representación social, Administración estatal e empresarial) pero "nin sequera se convidou a dirección do grupo empresarial", destaca a CIG. De feito, á xuntanza só acudiron o director xeral de Industria e o subdirector xeral de Políticas sectoriais industriais.
Os traballadores subliñaron a súa "decepción" co Goberno central e alertan de que Poligal "formulará o expediente de despedimento colectivo en breve"
O representante de CIG-Industria, Alberte Amado, sinala que "os compromisos acadados foron os mesmos que xa había e, tras unha semana, nin sequera contactaron coa empresa ou co administrador concursal para conseguir paralizar a presentación do ERE extintivo, tal e como se comprometeran dende o Ministerio"."Segundo as informacións que temos, Poligal formulará o expediente de despedimento colectivo en breve", alerta. "Non se pode facer campaña electoral co este conflito porque está en xogo o futuro de máis de cen empregos. Non poden anunciarnos reunións coa presenza da empresa que non se producen", engade Amado.
