Unidade sindical e política, 4.000 sinaturas e tamén peches. As horas previas á aprobación da medida"lei de medidas temporais en determinadas materias do emprego público da Comunidade Autónoma" foron horas de protesta nas múltiples sedes da Xunta en todo o país, pero tamén noutras instalacións públicas como os hospitais ou a sede da Compañía de Radio Televisión de Galicia.
Carteis con lemas como "a nosa dignidade non é recortable" ou "eu tamén estou diante do Parlamento" foron poboando ao longo do día boa parte das instalacións oficiais para esixir a retirada dun proxecto que, entre outros aspectos, reduce a xornada dos interinos, forza as xubilacións sen reemprazar as baixas, recorta prestacións sociais ou diminúe remuneracións. Avalados pola unidade de acción de CIG, CCOO, UGT e CSI-F, os peches chegaron tamén ao complexo administrativo central da Administración, en San Caetano, onde, segundo sinala a CIG, a intención dos traballadores é permanecer ata a propia aprobación da lei, na mañá do martes.
As mobilizacións trasladaranse tamén, nos momentos previos ao pleno do Parlamento, ás inmediacións do Pazo do Hórreo. No interior, PSdeG e BNG rexeitarán o plan gobernamental, que segundos os conservadores é "necesario" e non afecta aos salarios, insisten.
