O Consello de Ministros do venres pasado acordou a creación dun regulador multidisciplinar en España que asumirá o rol e traballo de oito organismos independentes que se ocupaban, até o de agora, de supervisar o mercado. Esta decisión supón, por exemplo, a supresión da Comisión Nacional de Competencia (CNC), ente de vital importancia para labregos e gandeiros, tal e como recolleu Praza Pública. Competencia multou esta mesma semana con máis de dez millóns de euros a Iberdrola por modificar as condicións tarifarias e de servizo dos seus clientes sen aviso previo. A CNC actuou tamén contra a abusiva posición dominante no mercado dalgunhas distribuidoras da alimentación. Precisamente neste ámbito é onde máis van estrañar, din desde Unións Agrarias, unha Comisión de Competencia "independente e proactiva". Telefónica, dez días antes desa reunión do Consello, presentou un informe no que reclama exactamente o mesmo que o que vén de aprobar o Goberno central.
No discurso de investidura de Mariano Rajoy, o líder do Executivo xa avanzou que era a súa intención a de reformar o organigrama de organismos de regulación. "Algúns dos sectores estratéxicos da nosa economía necesitan ser regulados, e da boa regulación e supervisión dos mesmos depende, en gran medida, a competitividade da nosa economía", afirmou. En base a estas declaracións Telefónica, compañía con maior capitalización bursátil do Ibex 35, decidiu encargar un informe a Pricewaterhouse Coopers "con obxecto de facilitar unha visión que enriqueza a discusión sobre o modelo organizativo das autoridades nacionais de regulación e competencia en España no marco da elaboración da mencionada Lei".
A recomendación de Telefónica
Segundo apunta devandito documento, pendurado na web www.tudosis.es, PwC recomenda "un menor nivel de intervención e unha substitución progresiva da regulación ex-ante que aínda se aplica nestes mercados por unha supervisión ex-post baseada nas normas de defensa da competencia alí onde sexa posible (similar a como ocorre noutros sectores da economía)". Por esta razón, Telefónica -a través deste estudo- aposta pola "redución e simplificación dos reguladores, garantindo en todo caso a súa capacitación técnica e especialización sectorial, e a racionalización do seu custo".
Con todo, o propio estudo recoñece que o establecemento dun regulador multisectorial "pode xerar unha perda de coñecemento específico dos sectores que supervisa" e, adicionalmente, "pode dar lugar a maiores riscos en caso de fallo institucional". Malia todo, o modelo final que propón Telefónica foi o que, finalmente, se acaba de poñer en marcha.
