As plataformas de afectados e afectadas pola estafa das preferentes e subordinadas están preparando unha gran manifestación para o vindeiro sábado 2 de febreiro en Santiago de Compostela. Para preparala reuniranse este martes no Parlamento con PSdeG-PSOE, AGE e BNG e tamén cos sindicatos UGT, CC.OO. e CIG.
De igual xeito, esperan acadar o apoio de deputacións e concellos para asegurar o éxito e o carácter masivo da marcha, despois de que a pasada semana a Deputación de Pontevedra ou a meirande parte dos gobernos municipais do Barbanza lles manifestasen o seu propósito de colaboración. Tamén está confirmada a participación de oito alcaldes das comarcas de Ferrolterra, A Coruña e Bergantiños coma Ares, Mugardos, Narón, As Pontes, A Capela, San Sadurniño, Oleiros e Carballo.
