O BNG presenta o seu programa para as europeas, co que busca un novo estatus para Galicia. Reclama un fondo lácteo, declarar o país como "zona altamente dependente" da pesca e axudas para Navantia logo do vento. "É o programa da rebeldía, dos que queren futuro e non se resignan", dixo o seu voceiro nacional, Xavier Vence.
La Sexta retrata a mala situación socioeconomica de Ferrol no seu programa La Sexta Columna, que inclúe a cidade departamental na súa "ruta polas cidades desafiuzadas". O vídeo analiza o elevado paro, a crise do naval e a degradación de Ferrol Vello e analiza "o declive da antiga capital do mar".
O Breogán iniciará o play-off de ascenso á ACB contra o Huesca e o Básquet Coruña contra o Oviedo. Os dous equipos galegos venceron onte na última xornada da fase regular da LEB Ouro.
A Fiscalía descarta que membros de Resistencia Galega participasen nos disturbios do 22M e pide novos informes sobre a presunta acción de independentistas galegos.
Un de cada cinco nenos galegos vive en situación de pobreza, segundo asegura Cáritas. Feijóo desdeñara hai uns días os datos desta entidade católica, ao igual que fixera o ministro Montoro.
Ascenden a 11 os detidos na operación policial polos incidentes do 22M. Serían os presuntos autores dos ataques máis graves contra os antidisturbios, segundo asegura a policía.
A primeira peritaxe avala a tese da deficiente sinalización de Angrois. Un experto maquinista destaca os "erros" e "incoherencias" de Adif.
A empresa de autobuses de Vigo retira un anuncio a prol da República. Vitrasa aceptou primeiro a publicidade pero logo alegou que os seus contratos vetan as mensaxes políticas.
O Goberno concede aos príncipes e á raíña o privilexio de ser aforados. De seren imputados, só poderían ser xulgados ante o Tribunal Supremo. A medida inclúese na reforma da Lei Orgánica do Poder Xudicial.
A sección Movementos Sociais de Praza Pública, nominada aos Premios Luceira de comunicación social, oganizados pola Coordinadora Galega de ONGD, a Rede Galega contra a Pobreza e Cermi Galicia. Os galardóns buscan "visibilizar e poñer en valor o traballo colectivo das distintas iniciativas de comunicación social que existen no país e que dan cobertura ás temáticas do eido social achegando análise, reflexión e participación social".