A OTAN culpa o goberno de Bashar al Asad da matanza con armas químicas e afirma que "non pode quedar sen resposta". O secretario xeral da Alianza, Anders Rasmussen, sinala que "información dispoñible dun amplo abano de fontes apunta ao réxime sirio como responsable do uso de armas químicas nestes ataques".
Fálase
As e os traballadores de Povisa trasladaron as súas protestas á sede da Xunta en Vigo na décima xornada de folga en defensa do convenio colectivo. Berraron consignas e lanzaron ovos reclamando a intervención da delegada autonómica no conflito laboral.
O Reino Unido presentará este mércores no Consello de Seguridade da ONU unha resolución para que condene o ataque con armas químicas "por parte de El Asad" e autorice "as medidas necesarias" para protexer "os civís sirios". A resolución será vetada por Rusia e pode que por China.
Emilio Pérez Touriño publica un artigo en El País no que amosa a súa preocupación pola situación dos partidos socialdemócratas, "dominados por burocratizados aparatos de profesionais da política que permanecen afastados das novas demandas e cambios sociais". O ex presidente da Xunta chama á socialdemocracia a un meirande compromiso coa unión política de Europa.
A maioría dos norteamericanos amósanse contrarios a unha intervención militar dos EE.UU. en Siria. Só o 9% apoiaría os ataques, un 25% se se demostra que o réxime de al-Assad empregou armas químicas, segundo unha enquisa de Reuters/Ipsos.
A páxina de The New York Times deixou de funcionar esta noite e segue tendo problemas esta mañá por mor dun ciberataque atribuído ao Exército Electrónico Sirio. Este grupo xa atacara outros medios norteamericanos e mesmo hackeou as contas de twitter dalgunhas cabeceiras.
O Ministerio de Emprego descarta a fórmula do dobre factor de sostibilidade, idea estrela do comité de sabios para recortar as pensións e tampouco recollerá os prazos para a súa aplicación. Publícao infoLibre.
O número de hipotecas sobre vivendas en Galicia foi de 397 en xuño deste ano, un 64% menos que o mesmo mes en 2012.
Un incendio en Ribeira, declarado ás nove da noite, obrigou a desaloxar centos de persoas e cortou a autovía do Barbanza, deixando case illada a vila durante parte da noite. O lume achegouse a uns depósitos de gas, ameazou o hospital e obrigou a desaloxar o polígono de Xarás. O lume está activo pero estabilizado.
David Cameron anuncia que este xoves se reunirá o parlamento británico para debater e autorizar a participación do Reino Unido nunha intervención militar en Siria.