Se este sábado ve vostede un grupo de persoas con toallas na cabeza ou un par de droides ou media ducia de soldados imperiais, non se asuste nin chame á policía. Entra todo dentro da normalidade. Este sábado Compostela acollerá dous eventos ben distintos pero que de seguro sorprenderán a quen non estea avisado: por unha banda, o Dia do Orgulho Lusista e Reintegrata e Dia Internacional da Toalha. E pola outra o segundo Imperial Stormtroopers, que coincidirá co 30 aniversario da estrea de O Retorno do Jedi.
O Dia do Orgulho Lusista e Reintegrata (DdoOLeR) terá na súa sétima edición a Teresa Moure como protagonista. Moure foi escollida este ano como madrinha despois da repercusión acadada polo artigo publicado hai unhas semanas no que facia unha pechada defensa do reitegracionismo e anunciaba a súa decisión persoal de empregar esta norma. Teresa Moure veu publicando nas últimas xornadas o manifesto Quatro imagens autênticas e uma só revolta interior, do que xa se puideron ler tres das súas catro partes no blogue do evento. Moure destaca que "O reintegracionismo não é só uma postura filológica. O reintegracionismo é também uma postura moral: a de comportar-se conforme às próprias convicções, ainda que nos deitem nas margens do sistema… Ou, talvez, por e precisamente para isso".
O programa do evento comezará ás oito da tarde na Praza de Maarelos con jogos de toalhas, un escrache ao ILG e a lectura do pregón a cargo de Teresa Moure. A partir das dez da noite as actividades trasládanse á Gentalha do Pichel, onde terá lugar unha Towel party con portugaleoke, DJs & VJs, caipirinha e moitas máis sorpresas
Tropas imperiais por Compostela
O 25 de maio as tropas imperiais volverán desfilar por Compostela. Será o segundo Imperial Stormtroopers e coincidirá co 30 aniversario da estrea de O Retorno do Jedi. O desfile comezará no Campus Sur ás seis da tarde e atravesará a Alameda para rematar na Praza do Obradoiro onde é posible que haxa unha recepción do alcalde ou outras autoridades locais a Darth Vader, Han Solo e o xefe ewok. A banda municipal de música de Valga tocara durante o desfile e o seu remate.
Por suposto, o evento non se reducirá ao desfile e haberá un completo programa de actividades que incluirá unha exposición de Star Wars, xogos, instrución militar para o desfile, un xantar de irmanamento e pola noite festas en distintos locais. A participación no desfile é aberta e a organización mesmo orienta sobre as opcións para facerse cun traxe.
