O grupo musical Terbutalina ficou "desconcertado" hai uns días. No medio da polémica a conta do contrato co que a Xunta paga 302.500 euros pola produción dun videoclip de Enrique Iglesias os membros da banda sorprendéronse pola "reacción de enfado e indignación do común da xente". "Por que? Porque nós contemplamos esa nova como unha oportunidade", explican. Nesta situación, deixaron a un lado os instrumentos musicais por un anaco e puxéronse a redactar un texto que xa teñen nas súas caixas de correo a directora e a xerente de Turismo de Galicia, o xefe da Área de Xestión Económica e Orzamentaria e mais o xefe de Contratación. "Á vista de que se volve apostar polo apoio aos artistas", os Terbutalina teñen unha proposta.
"Pode que non nos coñezan aínda, porque a Panorama aínda non toca ningunha das nosas cancións", advírtenlles aos cargos da Xunta, o que non implica que non entendan a "mensaxe positiva que nos estaban a enviar" coa achega para financiar o vídeo de Iglesias. "Froito do actual panorama de recuperación económica", esas axudas "supoñen un chamamento a que os artistas nos animemso a contactar con vostedes para levar a nosa arte un chanzo máis alá". "Se un fillo de emigrante como o señor Enrique Igleisas pode promocionar o noso patrimonio, como non imos poder facelo os que gozamos deste paraíso día sí e día tamén?", pregúntanse.
"Se un fillo de emigrante como o señor Enrique Igleisas pode promocionar o noso patrimonio, como non imos poder facelo os que gozamos deste paraíso día sí e día tamén?"
"Indo ao concreto", o grupo explica que están pensando en elaborar un "bo videoclip" para lanzar o seu novo disco, e por iso coidan que é o momento idóneo para presentar "algunhas ideas". Nese vídeo sería "importante que se vexan paisaxes, mais diferente aos que habitualmente saen neste tipo de pezas". "Era bo asunto filmar garitos, pubs e salas de festa de todo o país, así amósaselle ao turista máis motivos para nos visitar e coñecer". As novas cancións móvense "no universo da serie B; sangue, monstros e ese tipo de historias", polo que tamén precisarían un atrezzo en condicións. Asemade, o produto tería que contar con "actrices e actores de renome". Do mesmo xeito, "comer hai que comer", por iso "propoñemos que durante os días de rodaxe se encarguen O Fogar do Santiso dos xantares e o Bodegón A Corredoira, da cea e do viño".
Con estas condicións de partida, "toca falar de cartos": "Traballo de campo en pubs e garitos", 120.000 euros. "Equipo técnico", 180.000 euros, porque "mellor que sobre que que falte". Compra de vestiario no local compostelán Plásticos Santi, 60.000 euros -"caso de sobrar algo podemos coller macetas para xardíns e tumbonas para as praias", advirten-. "Apartado actoral", 120.000 euros, porque "aos da farándula hainos que ter contentos". "Comida e viño", 180.000 euros que se poderían "revisar" se o rodaxe se "alonga". Por último, 6.000 euros en xestoría.
En total, non serían máis que 666.000 euros que prefiren "cobrar por adiantado, que logo xa se sabe". Agora, "agardan resposta".