Unha semana despois da eliminación por parte de Instagram dunhas fotografías dun cocido galego, a rede social propiedade de Facebook ergueu o veto á súa publicación. Trala polémica xerada pola súa supresión, as imaxes do vigués Richard Barreira volven ser visibles e a dirección de Facebook en España mesmo se desculpou por teléfono co alcalde de Lalín, José Crespo, alegando que se producira un "erro técnico" nun dos algoritmos empregados pola compañía. Facíao en resposta á carta que o rexedor remitira nos días anteriores.
Unha semana despois da eliminación das imaxes por incorrer en "violencia gráfica" a compañía permite a súa publicación e alega que se produciu un "erro técnico"
A pasada semana Richard Barreira vía como unha publicación de varias fotografías celebrando o "primeiro cocido da tempada" na casa da súa nai era retirada pola compañía, da que recibiu unha mensaxe automática na que se lle comunicaba que as imaxes "infrinxiran as normas comunitarias" por "violencia gráfica, linguaxe que incita ao acoso, violencia e bullying ou espidos e actividade sexual". Barreira denunciou publicamente o sucedido e reclamou que as institucións se posicionasen "contra este atropelo á nosa cultura gastronómica".
Despois de varios días, nos que mesmo entidade como Galicia Calidade ou o Día Internacional do Cocido expresaron o seu apoio, publicando imaxes de cocidos nesta e noutras redes sociais, Facebook España corrixiu o seu erro. Non só permitiu a publicación, senón que se dirixiu expresamente a algunha das institucións e organizacións que criticaran publicamente o sucedido.
A responsable de Facebook en España desculpouse por teléfono con José Crespo, alcalde de Lalín
Lola Baños, responsable de Facebook en España desculpouse polo "erro técnico" e polas "molestias" que puido ter provocado. En resposta, José Crespo convidou expresamente á dirección da compañía a visitar Lalín durante a Feira do Cocido.
Tamén Richard Barreira celebrou a decisión, recuperando a publicación que fora eliminada e pechando o texto sinalando que “ser galego e non amar o cocido é una contradición mesmo biolóxica".