"Pan, traballo e teito". Con ese lema as Marchas da Dignidade levan meses mobilizadas, enchendo en marzo as rúas de Madrid nunha manifestación masiva, rodeando en xuño o Parlamento galego e, agora, buscan encher a praza do Obradoiro o vindeiro 29 de novembro. Este xoves representantes das marchas recolleron na cámara galega o apoio expreso dos grupos parlamentarios de AGE, BNG e mixto ás mobilizacións.
Ao redor de vinte representantes das máis de 60 organizacións que compoñen as marchas reuníronse con Xosé Manuel Beiras, Yolanda Díaz, Eva Solla e Xabier Ron (AGE), Francisco Jorquera (BNG) e Consuelo Martínez (Grupo Mixto). Jorquera expresou ese apoio en nome do grupo parlamentario do que é voceiro argumentando que así lle foi dirixida a convocatoria; no entanto, comprometeuse como membro da executiva nacional do BNG a manter unha xuntanza coas marchas en breve, e sempre antes do día 29, para fixar unha posición como organización.
Tras reunirse cos representantes políticos, Manolo Caamaño destacou en declaracións aos medios o apoio recibido por estes grupos parlamentarios e fixo un chamamento á participación do "pobo galego indignado" e "á clase traballadora". Outros representantes das marchas pediron a unión das orgazanizacións partidaria e dos sindicatos "na loita contra a troica" e confirmaron que non solicitaran un encontro co grupo do PSdeG-PSOE pois os socialistas "escolleron asinar para pagar a débeda antes que para dar resposta ás necesidades do pobo".
"Loitamos polos nosos dereitos, e seguiremos a loitar mentres non consigamos cambiar un sistema inxusto e antidemocrático e devolver o poder ás persoas, sometendo ó poder político á vontade popular. Loitaremos por ter pan, traballo e teito para o noso país", deste xeito pechábase o manifesto lido polas Marchas da Dignidade o pasado 21 de xuño, e unha mensaxe semellante guiará a mobilización do vindeiro día 29, unha "mobilización unitaria e masiva contra o pago da débeda, polo emprego digno, polos dereitos sociais, polas liberdades democráticas, contra os recortes, a represión e a cor upción, pola renda básica, por unha sociedade de muleres e homes libres; unha mobilización contra un réxime e uns gobernos que nos agreden e non nos representan", como destacaba o escrito entregado este xoves no Parlamento.
Nos días anteriores ao 29 seis marchas percorrerán a pé Galicia, partindo dende Ferrol, Viveiro, O Barco, Verín, Tui, Gondomar, Ponteareas e Noia, confluíndo nalgúns casos e chegando a Compostela na mañá dese sábado 29. Entrarán na cidade por cinco camiños distintos, chegando ao Obradoiro ás doce do mediodía. Ademais, o domingo pola mañá partirán autobuses dende varias cidades do país, buscando facer desta unha mobilización masiva. Nalgúns casos, coma o da columna sur, que parte das comarcas do Baixo Miño, O Condado e Vigo, a andaina xa comezará o vindeiro sábado 22. Noutros territorios do Estado, algunhas marchas veñen de iniciar estes días o seu camiño.
E é que, en paralelo ás mobilizacións galegas, ao longo desa semana (entre o 24 e o 29 de novembro) en todo o Estado as Marchas de la Dignidad convocan distintas accións de protesta: en defensa do emprego, pola renda básica, contra os recortes nos servizos públicos, contra o pagamento da débeda, contra o TTIP e, de forma moi especial, o 25 de novembro contra a violencia machista. O 29 de novembro haberá manifestacións en todos os territorios do Estado.
![](https://praza.gal/storage/xornal/uploads/fotos/foto/5464c865f300f-b2ulkr_imaaswjp.jpg)
![](https://praza.gal/storage/xornal/uploads/fotos/foto/5464c8981cbd9-b2ubd1qiqaa0pwc.jpg)