Andrea poderá morrer dignamente. Unha semana despois de que os seus pais, Estela e Antonio, decidisen sacar á luz pública a reclamación de morte digna para a súa filla de 12 anos, que padece unha enfermidade neurodexenerativa irreversible, o Servizo de Pediatría do Clínico de Santiago accede á súa petición e retiraralle a alimentación artificial. Así o vén de anunciar o avogado da familia ás portas do centro hospitalario.
O cambio de criterio ou, o que é o mesmo, o seguimento das recomendacións do Comité de Ética Asistencial, que dende hai un mes viña avalando a petición familiar, chega despois da intervención dun xulgado de Santiago. A pasada semana o tribunal recibira dúas peticións ao respecto: unha dos pediatras, para reclamar "orientación", e outra da familia, para esixir a retirada do soporte vital.
Tras a intervención da xustiza o servizo de pediatría accede á retirada da alimentación artificial
Esas actuacións xudiciais incluíron a remisión ao xulgado de todo o historial médico de Andrea e, sobre todo, un exame da doente por parte dun forense do Instituto de Medicina Legal de Galicia (Imelga). Tal e como ditara na súa providencia, unha vez examinada a documentación o maxistrado citou os pais da nena. Foi precisamente nese encontro, este luns, cando Estela e Antonio foron chamados a acudir ao hospital para seren informados dunha "flexibilización" no tratamento, que finalmente implica a retirada da alimentación artificial e a sedación.
O xulgado velará polo "cumprimento" do acordado
Segundo confirma o Tribunal Superior de Xustiza de Galicia, os acontecementos precipitáronse tras unha comunicación do hospital ao Xulgado de Familia, na que se comunicaba "unha nova posibilidade de tratamento paliativo, consistente en retirar a alimentación e manter unicamente a hidratación necesaria para permitir a sedación". Foi o propio xulgado o que "emprazou os pais e o hospital a manteren unha xuntanza esta tarde" para abordar o "plan proposto" e, "no caso de chegar a un acordo", informar ao respecto o propio xulgado, que "realizará un seguimento do caso para comprobar" o seu "cumprimento".
Primeiro caso coa nova lei
O caso de Andrea foi o primeiro que chegou á escena pública tras a entrada en vigor da lei que, dende o pasado xullo, regula en Galicia o dereito a morrer dignamente. A lexislación vixente, así como o ditame do Comité de Ética Asistencia, deberan, segundo o xulgado compostelán, servir como guías para tomar unha decisión, tal e como ficou reflectido nun auto do pasado mes de xullo.
"O sufrimento da nosa filla é insoportable, só pedimos que a deixen marchar dignamente"
"O sufrimento da nosa filla é insoportable, só pedimos que a deixen marchar dignamente", resumía Estela Ordóñez, a nai de Andrea, nunha entrevista con Praza Pública. Os tratamentos e a propia alimentación artificial, detallaba, estaban a deixar a nena "esgotada fisicamente". "O seu corpo non dá para máis", clamaba. Este, e non ningún outro, é o motivo para esa petición de morte digna: "se se fose apagando pero non tivese sufrimento estaríamos os meses que fixese falta e non pelexaríamos", dicía-
Malia á coincidencia da petición familiar co criterio médico e o ditame do comité, o veto do Servizo de Pediatría do CHUS obrigou a familia a redobrar os seus esforzos á procura da fin do "sufrimento" da nena. Os responsables do servizo, avalados pola Xunta, insistiron durante días en que non se trataba do caso dunha paciente terminal, e a agora exconselleira de Sanidade, Rocío Mosquera, chegou a cualificar o caso como "eutanasia". Finalmente, o hospital muda de criterio e a vida de Andrea deixará de ser sostida artificialmente.
