O que ía ser unha manifestación local, en Vilaxoán, para esixir de Garavilla -propietaria de Conservas Cuca- a reapertura da factoría na vila, cumprindo así a sentenza xudicial que dende hai tres meses a obriga a facelo, creceu até ser algo máis. Máis en canto ás demandas que porá na rúa, comenzando pola reivindicación ao problema do desemprego, e tamén en canto á súa extensión, converténdose nunha mobilización de ámbito comarcal, apoiada pola corporación municipal de Vilagarcía ao completo, e tamén por distintas entidades sociais (asociacións de veciños, confrarías, sindicatos...) de varios concellos.
A marcha, baixo o lema En defensa do emprego e o futuro de Vilagarcía, percorrerá as rúas de Vilaxoán dende as oito da tarde, partindo da conserveira e concentrándose ante a sede do INEM e ante o concello. Búscase, como salienta Francisco Vilar (CC.OO.) demandar a defensa dos postos de traballo en toda a comarca, a través do conflito aberto de Cuca, "para que os mozos e mozas non teñan que emigrar".
Búscase demandar a defensa dos postos de traballo en toda a comarca, a través do conflito aberto de Cuca, "para que os mozos e mozas non teñan que emigrar"
A situación segue sendo a mesma dende hai varias semanas. En xaneiro unha sentenza do TSXG deulles a razón ás traballadoras, confirmando todos os puntos do fallo emitido en marzo de 2013 polo xulgado número 2 do Social de Pontevedra, anulando o ERE (que afectara a 69 persoas) e o traslado da empresa ao Grove, e instando a reanudar a produción na súa localización orixinal. Porén, a empresa leva tres meses ignorando esta sentenza. A presión das traballadoras forzou a compañía a ofrecer unha solución intermedia e temporal: un transporte gratuíto entre Vilaxoán e O Grove, no que, ademais, o tempo de viaxe de ida e volta sería contabilizado dentro da súa xornada laboral. Porén, o persoal de Cuca segue esixindo que a empresa cumpra todos os puntos da sentenza e reabra a fábrica de Vilaxoán.
O Concello de Vilagarcía nos últimos días aprobou por unanimidade de todos os grupos con representación municipal (PP, IVIL, PSOE, BNG e EU) apoiar a mobilización
Unha reivindicación que dende o comezo atopou a unanimidade dos veciños, veciñas, e forzas políticas nesta localidade, e en todo o Concello de Vilagarcía, que nos últimos días aprobou por unanimidade de todos os grupos con representación municipal (PP, IVIL, PSOE, BNG e EU) apoiar a mobilización, imprimindo ademais medio milleiro de cartaces, distribuídos por todo o concello. Esta unanimidade, que tamén se estende a outros ámbitos (tamén a asociación de comerciantes Zona Aberta apoiará a manifestación), choca co silencio do Goberno galego nos últimos meses, dende que o TSXG fixo público o seu fallo, e tamén coa defensa firme que a Xunta lle deu á empresa vasca Garavilla. Por exemplo cando, coa axuda da policía, desmantelou a planta de Vilaxoán, mesmo habendo xa unha primeira sentenza xudicial que lles daba a razón ás traballadoras. Naquela ocasión o PP empregou a súa maioría absoluta no Parlamento para impedir que o vicepresidente tivese que ofrecer explicacións por esta acción.
Curiosamente, tan só dous meses antes o Parlamento aprobara por unanimidade unha proposición non de lei presentada polo Grupo Popular a través da que se instaba á Xunta de Galicia "a desenvolver cantas xestións sexan necesarias ante a propiedade, para garantir os postos de traballo da factoría Conservas Cuca de Vilaxoán" e a manter a factoría na súa ubicación orixinal. Hai dúas semanas o PSdeG-PSOE presentou una batería de iniciativas parlamentarias para esixirlle á Xunta que garanta o cumprimento das sentenzas xudiciais e o cumprimento igualmente da devandita prosición non lei que a cámara aprobara por unanimidade. Aínda se está á espera da resposta do Goberno galego sobre estas cuestións.
A empresa Garavilla reiterou nos últimos días a súa negativa a cumprir a sentenza do TSXG
Pola súa banda, o outro actor deste conflito, a empresa Garavilla, reiterou nos últimos días a súa negativa a cumprir a sentenza do TSXG e asegurou que a reapertura da fábrica é "inviable", ao tempo que acusou as traballadoras de Cuca de mobilizarse unicamente buscando unha indemnización para "xubilarse sen volver traballar".
