As plataformas en defensa da sanidade pública convocan protestas en todas as comarcas galegas

Diversos grupos en defensa da sanidade pública concéntranse hoxe en numerosas prazas de toda Galicia. SOS Sanidade Pública, Plataforma Galega Polo Dereito ao Aborto ou o Grupo de apoio aos COF convocan unha concentración para hoxe ás 20 horas en diversas localidades galegas “en diferentes formatos pero co mesmo obxectivo”: a demanda dunha Lei de Garantías Sanitarias xusta, a defensa do dereito a decidir das mulleres sobre o aborto e a petición dunha atención da saúde sexual e reproductiva de calidade que se está vendo ameazada polos recortes.

As plataformas defenden que é preciso continuar coas protestas dado que a Xunta está destruíndo a sanidade pública galega tal e como a coñecemos introducindo copagos, recortes en asistencia e persoal ou desmantelando e privatizando os centros sanitarios. Ademáis, protestan contra o proxecto de lei de Garantías de Prestación Sanitaria que presentou a conselleira de Sanidade, Rocío Mosquera, o pasado 25 de xuño no Parlamento. As diversas plataformas defenden que é “unha lei de garantías falaz e enganosa coa que se pretende acabar de desmantelar o sistema sanitario público e facilitarlle á privada o incremento do negocio”. Esta lei permitirá traspasar enfermos a centros privados ou concertados se se incumpren os límites das listas de espera que a propia Xunta vai marcar, o que vai supor “unha especie de privatización das listas de espera” como informa a plataforma SOS Sanidade Pública de Lugo.

Protestan contra o proxecto de lei de Garantías de Prestación Sanitaria que presentou a conselleira Rocío Mosquera esta semana no Parlamento

Mobilizacións convocadas:

A Coruña: concentración cidadá ás 20 horas no Obelisco.
Ferrol: manifestación ás 19:00 horas dende a Praza de España e con remate na Praza de Armas.
Santiago de Compostela: concentración ás 20:00 horas na Praza do Toural.
Ribeira: ás 20.30 horas na Praza do Concello.
Vilagarcía: concentración ás 21:00 horas na Praza de Galicia.
Pontevedra: concentración-conferencia ás 20:00 horas na Praza da Peregrina.
Vigo: abrazo ao Hospital Xeral ás 20:00 horas.
Lugo: ás 11.15 contarán co grupo Achádego Teatro representando a micorpeza teatral Recortar recortarei

O funcionariado galego tende á sanidade pública coa Policía e o persoal xubilado como feudos da privada

luns 16, decembro 2024

"Muface non é unha opción", pero si o é elixir sanidade pública ou privada, subliña a CIG nun informe que revela as cifras actuais en Galicia da mutua do funcionariado en pleno debate sobre a súa continuidade: case o 60% do profesorado do ensino público galego acode á sanidade pública e a cifra sobe ao 85% entre docentes incorporados nos últimos catro anos. A primacía da privada chega ao 70% entre o persoal funcionario xubilado e dispárase a un 90% entre os policías en activo

O hospital de Ourense acumula a maior lista de espera de Galicia para consultas e cirurxías

xoves 5, decembro 2024

A Consellería de Sanidade publica a 5 de decembro os datos sobre as listas de espera no Sergas que se corresponden cunha foto fixa do mes de xuño. Confirma así os 72 días que de media ten que esperar unha persoa en Galicia para unha operación e os 71,6 días que hai que agardar de media por unha cita para unha consulta médica nos hospitais do Sergas.