As restricións nos medicamentos enchen as farmacias de temores e "resignación"

Letreiro dunha farmacia CC-BY-NC-SA PSdeG

Manuel -nome figurado- traballa nunha farmacia dun pequeno concello da provincia da Coruña dende hai seis anos. Os algo menos de 10.000 habitantes do municipio e arredores teñen á súa disposición esta farmacia os sete días da semana e así foi tamén o pasado domingo, cando á traballadora que lle correspondía estar de garda lle tocou tamén responder ás dúbidas dos primeiros clientes, nomeadamente das primeiras persoas xubiladas, que tiveron que pasar por caixa para poder levaren a súa medicación. Non foron moitos, subliña Manuel. Nos días previos á entrada en vigor do novo copagamento ou, mellor dito, subliña en conversa con Praza Pública, do novo "repagamento", os usuarios fixeron acopio de fármacos "como se fosen acabarse". Este, di, é un síntoma máis dun panorama "complicado", para os receptores da prestación farmacéutica, aos que ve maioritariamente "resignados", pero tamén para o propio sector das farmacias e para os seus traballadores.

Porque os axustes e recortes decididos polo Goberno central e replicados en Galicia pola Xunta preocupan especialmente a profesionais do perfil de Manuel, con experiencia e bo facer no sector pero sen negocio propio. Para eles "a situación mete medo", ilustra, nun contexto de caída de ingresos que, paradoxalmente, di, vai paralelo a un aumento de gastos por parte da clientela con menos ingresos, os xubilados, que non só se enfrontan a ter que achegar 8, 18 ou 60 euros ao mes en función da renda, senón tamén a ter que pagar por medicamentos comúns que ata agora financiaba o sistema público e que están a piques de dar o salto ao mercado libre con todas as da lei.

"Venden que se van manter os prezos pero isto non é así; o Flumil cando saíu do seguro custaba 1,90 e pasou a valer 5,89"

Neste caso, o da exclusión de fármacos, Manuel agarda unha excepción á caida xeralizada de prezos e non baseándose en opinións, senón na experiencia. Xa aconteceu, por exemplo, cos produtos antigripais. "Dende que están fóra do control da Seguridade Social" as grandes empresas farmacéuticas "fan o que lles dá gana" e xa non é posible acceder a un destes fármacos, "como a Couldina, por exemplo", por menos de "seis ou oito euros". O mesmo, exemplifica, "pasou co Flumil, que cando saíu do seguro custaba 1,90 e pasou a valer 5,89". Por este motivo Manuel dubida moito de que se fagan realidade os augurios do Ministerio de Sanidade, segundo os cales os medicamentos que deixarán de ser financiados "van seguir valendo dous euros". "Venden que se van manter os prezos pero isto non vai ser así", polo que "vai haber xente que prescinda de medicamentos" por "non poder pagar" e o "golpe" caerá, de novo, di, nas costas do sector e, sobre todo, dos seus asalariados. "Vai chegar un momento no que isto vai estoupar, as farmacias non van ser coma antes e non van poder manter os traballadores".

Así as cousas, Manuel non o dubida que con estas reformas "perdemos todos": pacientes e traballadores que ven en risco o seu emprego e o da "rede de persoas" que fan posible o funcionamento normal das oficinas de farmacia, como transportistas e almacenistas. A esta incerteza súmase tamén a escasa confianza que o sector detecta en torno á decisión da Xunta de evitar que os pensionistas teñan que adiantar máis dos correspondentes 8, 18 ou 60 euros. "Ata cando vai ser isto?", pregúntase Manuel antes de relatar que, nas xuntanzas mantidas nas últimas semanas entre profesionais coma el, se teme que isto sexa "unha medida electoralista" ou "froito da improvisación". Non en van, sinala, hai apenas unha semana "no Colexio de Farmacéuticos aínda non se sabía como ía funcionar isto", unhas dúbidas acrecentadas porque "a conselleira [de Sanidade] di unha cousa e o presidente di outra".

Dificultades técnicas e optimismo da conselleira

A conselleira reduce as dificultades de aplcación do sistema a algunhas "preguntas" de usuarios

Mentres nas farmacias xa comezan a detectarse as primeiras dificultades técnicas derivadas, por exemplo, da chegada de turistas de Euskadi -o Goberno Vasco non aplica o novo copagamento, polo que en Galicia os seus cidadáns teñen que pagar e tramitar a devolución ao regresaren-, a conselleira de Sanidade, Rocío Mosquera, aseguraba este luns que o novo sistema está a funcionar "perfectamente", coa excepción dalgunhas "preguntas e requerimentos" solucionados "en tempo real" polos servizos técnicos correspondentes. 

Así e todo, malia ese diagnóstico de normalidade Mosquera advirte de que se algún doente "non está de acordo" co umbral de renda que figura nos arquivos do seu departamento "ten que dirixirse ao Instituto Nacional da Seguridade Social coa última declaración da renda, para comprobar que están ben tipificados". Sobre os pacientes doutras comunidades autónomas a conselleira si admite certos atrancos derivados, di, de que "non viña ben tipificada a receita e houbo que consultar a base de datos no Ministerio.

Letreiro dunha farmacia CC-BY-NC-SA PSdeG

Despece

  • SOS Sanidade: "O PP colleu a autoestrada cara á sanidade privada"

    No primeiro día laborable dende a entrada en vigor do Real Decreto Lei que inclúe o novo copagamento farmacéutico a plataforma SOS Sanidade Pública expresou o seu rexeitamento aos recortes cunha concentración ante a sede do Servizo Galego de Saúde na Coruña. Para o colectivo, que aglutina os principais sindicatos, as formacións políticas máis representativas e a diversos colectivos sociais, a nova norma "non é só unha medida de aforro", senón que supón o "inicio do cambio cara a un sistema sanitario con dobre cara", en función de que os pacientes sexan ou non "ricos". Isto, a efectos prácticos, din, non é outra cousa que encamiñar o sistema público de saúde por unha "autoestrada cara á privatización".

    Lanzar esta alerta non é "ser alarmistas", asegura. "Hoxe non temos aínda unha sanidade de beneficencia" pero as decisións da Xunta e do Goberno central xa están a "incentivar a oferta privada de todo tipo". "Parece -lamentan- que o importante para o PP é o noegocio e o demenos, as persoas". Isto demóstrase, ao seu xuízo, ao ollar un decreto que "suprime a asistencia sanitaria como dereito cidadán, elimina a universalidade das prestacións sanitarias, introduce barreiras económicas para o acceso aos servizos sanitarios a quen máis o necesita" e, ademais, "acaba co carácter solidario e redistributivo do sistema". "A diferenza dos nosos gobernantes nós non somos mentireiros" e por iso, advirten, "non imos parar", senón que "seguiremos denunciando os abusos ata que teñamos unha sanidade pública, de calidade e digna para toda a poboación".

    Concentración de SOS Sanidade na Coruña CC-BY-SA SOS Sanidade Pública

  • O BNG reitera a necesidade de recorrer no TC o "imposto á enfermidade"

    Tras a entrada en vigor do Real Decreto Lei que contén o recorte sanitario o BNG insistiu este luns na necesidade de que o Goberno galego recorra ante o Tribunal Constitucional unha normativa que "invade competencias" e que "non só é suicida no terreo económico, senón que tamén é cruel coas persoas". A xuízo da portavoz dos nacionalistas no Parlamento, Ana Pontón, o "medicamentazo" é "unha medida inxusta e inútil para loitar contra a crise" que ademais "se ceba coas persoas máis desfavorecidas". As dificultades económicas, lamenta, estanse "aproveitando" dende os gobernos galego e central para "levar adiante unha contrarreforma privatizadora do sistema sanitario" que "está a minar as súas bases", isto é, a "universalidade e a solidariedade".

    Neste contexto Pontón lamenta que a única "alternativa" do PP sexa "crear un imposto á enfermidade" ante o cal coida "grotesco escoitar ao señor Feijóo" describindo "as bondades" do sistema, baseándose en que "hai 116.000 persoas -os parados sen prestación- que van pagar menos". "O que nos está dicindo é que o resto da poboación vai pagar máis", tamén aquelas persoas que perciben "as pensións máis baixas do Estado". Precisamente por isto, salienta, resulta especialmente "grave" que a Xunta "acepte esta contrarreforma submisamente" despois de dicir que "ten maior solvencia" que o resto de autonomías. 

    Non só é suicida no terreo económico senón que tamén é cruel coas persoas. O medicamentazo, medida inxusta e inútil para loitar contra a crise, que se ceba coas persoas máis desfavorecidas. Estamos vendo como se aproveita para levar adiante unha contrarreforma privatizadora do noso sistema sanitario público. O PP está a minar as bases do noso sistema sanitario; a universalidade, a solidariedade. A súa alternativa é crear un imposto á enfermidade. "Se tiñamos unhas contas cadradas que prevían poder facerlle fronte ao gasto sanitario, por que a aplica?", cuestiona.

    Jorquera, con Pontón e Bouza CC-BY-NC-SA BNG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza