Este venres 24 de xullo farán dous anos do accidente do Alvia en Angrois que acabou coa vida de 81 persoas en 2013. Coincidindo con este segundo aniversario, a Plataforma Víctimas Alvia 04155, que agrupa a maioría de vítimas e familiares, concentrarase na praza do Obradoiro de Compostela, demandando a depuración de responsabilidades políticas polo sucedido e denunciando "o trato humillante" que están recibindo "por parte do Goberno do PP, do PSOE e dalgunhas institucións públicas, xerando, aínda se cabe máis dor nas vítimas".
Unha das súas principais reivindicacións é a creación dunha Comisión de Investigación Parlamentaria no Congreso, un órgano cuxa constitución foi proposta por forzas coma o BNG ou a Esquerda Plural, pero que conta coa oposición de PP e PSOE. "Que é o que temen? Que pretenden ocultar? É isto transparencia e rendición de contas?", pregúntase a plataforma.
Unha das súas principais reivindicacións é a creación dunha Comisión de Investigación Parlamentaria no Congreso
Esixen "responsabilidades políticas", criticando que o maquinista apareza "como único responsable". Sinalan que "hai apenas dous meses o perito independente César Mariñas ratificaba no xulgado a rebaixa en materia de seguridade que sufriu a liña Ourense-Santiago e os incumprimentos en normativa de seguridade ferroviaria, cualificando o accidente de 'previsible' tendo en conta a normativa actual e o estado do coñecemento técnico no sector". Neste senso, acusan as administracións de mentir "gravemente" sobre a Liña de Alta Velocidade Ourense-Santiago cando se asegurou que "contaba con maior seguridade, a última tecnoloxía e sistemas de condución automática".
Así mesmo, critican que "ningún responsable político dimitiu e para humillación das vítimas algúns foron mesmo premiados". Citan os exemplos do antigo secretario de Estado de Infraestruturas, Rafael Catalá, que foi nomeado ministro de Xustiza; o do presidente de Renfe, Julio Gómez Pomar, agora secretario de Estado de Infraestruturas; o do ex ministro José Blanco, "que inaugurou a liña de forma apresurada e sen a procedente análise de riscos", agora eurodeputado; ou o do novo presidente de Renfe, Pablo Vázquez, antigo presidente de Ineco, responsable da homologación do tren. Ademais, sinalan que o presidente de Adif, Gonzalo Ferré, "continúa no seu cargo a pesar de mentir en sede parlamentaria".
Láianse tamén do "trato inhumano" recibido por parte do presidente da Xunta "que nos recibiu cos Antidisturbios cando nos negabamos a recibir unhas medallas que non queriamos"
Láianse tamén do "trato inhumano" recibido por parte do presidente da Xunta "que nos recibiu cos Antidisturbios cando nos negabamos a recibir unhas medallas que non queriamos". E denuncian, igualmente, que o Estado "non protexe nin defende as vítimas", criticando a actuación do Fiscal Antonio Roma "que só defende os intereses de Adif e Renfe, recorrendo por dúas veces as imputacións do xuíz a altos cargos destas empresas públicas" ou a "falta de colaboración" coa Xustiza de Renfe e Adif.
Critican o estancamento do proceso xudicial, cunha investigación que "leva case un ano parada co cambio do novo xuíz"
Así mesmo, critican o estancamento do proceso xudicial, cunha investigación que "leva case un ano parada co cambio do novo xuíz, a pesar de que existen moitos argumentos para novas imputacións e para que declaren os responsables de seguridade de Renfe e Adif".
A Plataforma esixe "verdade, transparencia e xustiza" e destaca que o accidente podería ter sido evitado
A Plataforma esixe "verdade, transparencia e xustiza" e destaca que o accidente podería ter sido evitado e que "varias decisións do goberno anterior (PSOE) e do actual (PP) comprometeron a seguridade dos viaxeiros" e que "intereses comerciais e políticos antepuxéronse á seguridade das persoas". Destacan, en concreto, como factores determinantes, o cambio do proxecto orixinal en 2010 (sendo ministro José Blanco), a desconexión do sistema de condución automática ERTMS en xuño 2012 (sendo ministra Ana Pastor), ou o feito de ter ignorado a advertencia de perigo do xefe de Maquinistas de Ourense, José Ramón Iglesias Mazaira, o 26 de decembro de 2011.