A Asociación Animalista Libera iniciou hai uns días unha petición online na que insta o Concello da Coruña, en concreto a Mª Begoña Freire Vázquez, Concelleira de Tráfico, a modificar a normativa que na actualidade prohíbe o acceso dos animais domésticos ao transporte público na cidade. Na iniciativa, que dende un comezo buscaba recoller cinco mil apoios e que xa roza as catro mil, pídese unha flexibilización desta normativa, para permitir o acceso fixando unhas determinadas condicións, como xa comezaron a facer algunhas cidades do Estado, como Barcelona, Zaragoza ou Fuengirola, e como é habitual na meirande parte de Europa.
A iniciativa está promovida por Libera, que pide unha modificación lexislativa coma a que recentemente se aprobou en Zaragoza, Funegirola ou Barcelona. Na meirande parte das cidades de Europa é unha práctica habitual
Na actualidade, segundo a ordenanza de protección e tenza de animais da Coruña, estes só poden subir no autobús "nun transportín ou modelo análogo", o que dificulta moito a viaxe para os cans medianos ou grandes. A petición lembra que moitos cidadáns empregan as redes do autobús público para trasladar cans e gatos ás clínicas veterinarias, ou tamén para achegarse a unha área canina, que na Coruña só existe no Parque de Santa Margarida. Libera salienta que "flexibilizar esta situación supón mellorar a convivencia e realizar unha importante tarefa de sensibilización a favor da protección e respecto cara aos animais, fomentando tamén a fin da exclusión dunha porcentaxe de potenciais usuarios".
Dende o 1 de xaneiro en Zaragoza as preto de 150.000 persoas que conviven con algún animal doméstico poden viaxar con eles no transporte público da cidade. Iso si, esta medida está suxeita a condicións, pois os animais deben viaxar na parte traseira de autobuses e tranvías e deben ir atados e levar bozo. Na meirande parte das cidades de Europa o acceso permítese dende hai moito tempo, e en moitos lugares se ningunha obriga de levar atados os animais. Dependendo das cidades, os animais teñen que pagar unha parte do billete ou non.
