De Nador a Tánxer: redescubrindo para que serve o xornalismo

As catro galegas participantes no proxecto, á súa chegada a Marrocos © Agareso

Entre Nador e Tánxer hai ao redor de 500 quilómetros, ducias de vilas e proxectos de cooperación en marcha, as máis das veces pouco ou nada coñecidos en Galicia e practicamente invisibles para os medios de comunicación. Nos últimos días catro estudantes do III Seminario Xornalismo social e cooperación internacional impartido na USC atópanse en Marrocos para coñecer de primeira man a actividade e a loita das organizacións locais a prol do desenvolvemento. A iniciativa da Asociación Galega de Reporteiros Solidarios (AGARESO) e a ONG Asemblea de Cooperación pola Paz (ACPP) pódese seguir nun blog actualizado a diario.

Noelia Antelo (Carballo), Diana Mandiá (Santiago de Compostela), Aida Mosquera (A Coruña) e Ángela Muñiz (Portas) foron as catro xornalistas escollidas para realizar esta viaxe, que se iniciou o pasado 20 de agosto, e que "busca sensibilizar as e os novos profesionais da comunicación sobre o seu papel na consecución dun mundo máis xusto", segundo Agareso. Na última semana, da man de entidades locais coma Homme et Environnement, Azir e Asticude, as catro xornalistas reuníronse con cooperativas de agricultores, visitaron centros de mulleres onde se traballa pola igualdade, coñeceron iniciativas a prol da pesca sostible ou accións para evitar a emigración ilegal de menores non acompañados. 

Esta semana as catro mozas atópanse xa en Tánxer coñecendo de preto a actividade da ONG Ahlam nas áreas educativa e sanitaria e teñen previsto asemade entrevistarse coa destacada feminista Nadia Naïr. Tamén se achegarán ao traballo en materia de xénero das asociacións 100% Mamans e Atawassoul, así como á defensa dos dereitos humanos da Rede Chábaka.

 

O blog, moitas historias de contar

A actividade deste proxecto e as visitas e encontros que están mantendo pódense seguir a diario no blog De Nador a Tánger. Alí podemos ler a entrevista a un dos responsables da Association Ahlam pour le Developpement, con proxectos relacionados coa educación, a saúde, a economía social, os dereitos humanos, a emigración e o desenvolvemento "para contribuír á promoción das liberdades, a democracia real e a participación cidadá en Marrocos". Ou o retrato de Beni Enzar, na provincia setentrional de Nador, unha vila moi próxima á tristemente famosa valla fronteiriza de Melilla, "un valo de once quilómetros de inxustizas, ilegalidade, golpes e desesperación que apaga na maior parte dos casos a esperanza de lograr unha vida digna".

Tamén podemos ler unha entrevista a Jamila, presidenta da Asociación Wafae, á que cada día acoden 60 mulleres para formarse e realizar diferentes actividades que dan como resultado produtos que despois comercializan a pequena escala. Jamila destaca que "a vida do centro é a única oportunidade para desconectar da vida familiar" e supón unha “excusa para deixar a casa”. Ou podemos coñecer o proxecto da cooperativa Elwifak, grazas á que un grupo de labregos desta zona do norte de Marrocos poden comercializar directamente aceite de oliva, mel e produtos agrícolas.

As catro galegas participantes no proxecto, á súa chegada a Marrocos © Agareso
As catro xornalistas están a visitar varios proxectos de cooperación en marcha © Agareso
Jamila, presidenta da Asociación Wafae © Agareso

Despece

  • Máis de 41.000 persoas colaboran nas ONGD galegas

    En Galicia, máis de 41.000 persoas forman parte da estrutura das ONGD. Participan nos equipos de voluntariado, son persoal contratado ou forman parte da base social das 46 ONG de Desenvolvemento integradas na Coordinadora Galega de ONGD. A maioría, son mulleres de entre 25 e 40 anos. Delas, algo menos de dúas mil colaboran a diario nos distintos proxectos en marcha, e outras 39 mil son socias destas entidades.

    Algo menos de dúas mil colaboran a diario nos distintos proxectos en marcha, e outras 39 mil son socias destas entidades

    Nas ONGD tamén traballan persoas que manteñen un vínculo laboral coa organización. Na actualidade, as ONGD teñen contratadas 82 persoas en Galicia e 9 no estranxeiro. Estas cifras son menores cás de 2010, momento no que había 107 contratos en Galicia. Das 82 persoas que traballan en Galicia, unha gran maioría son mulleres (61), pero tamén son elas as que teñen unha situación laboral máis fráxil, cunha maior porcentaxe de contratos temporais e a tempo parcial que os homes. Nos últimos anos, avanzouse moito nestes aspectos e, por exemplo, a participación de mulleres nos equipos directivos creceu de forma clara. Aínda así, hoxe hai máis homes que mulleres nos postos de presidencia (26 fronte a 20, respectivamente) malia que elas teñen máis presenza nas organizacións.

    Das 82 persoas que traballan en Galicia, unha gran maioría son mulleres (61), pero tamén son elas as que teñen unha situación laboral máis fráxil

    Outro elemento fundamental que permite o traballo das ONGD son as contrapartes: as organizacións sociais nos países do Sur. Estas organizacións son as que coñecen a realidade local, as necesidades e as formas axeitadas para traballar en cada comunidade. A maioría tamén son organizacións formadas por persoal contratado, voluntariado e base social. En Galicia, as ONGD traballan con máis de 40 contrapartes de América Latina e África.

  • Marcos Pérez Pena

    Marcos Pérez Pena

    Marcos Pérez Pena (Montevideo, 1980). Tras ter traballado en Vieiros.com e outros medios, en 2012 formou parte do equipo que puxo en marcha Praza. Doutor en Xornalismo pola USC, analizou na súa investigación o papel da prensa en Galicia durante a Transición.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza