Os avogados de Carlos Calvo, que leva 6 meses de prisión preventiva acusado dun “presunto delicto de pertenza a organización terrorista e presunto delicto de tenencia de explosivos”, denuncian que a Audiencia Nacional intenta evitar a súa inmediata posta en liberdade mediante a imputación dunha nova acción do 2011 e cuxa investigación fora pechada sen autor coñecido.
O seu avogado, o catalán Benet Salellas, presentou o 28 de febreiro un recurso de reforma contra o auto de procesamento de Carlos Calvo, argumentando que "en todo o sumario de 4 tomos non hai indicios suficientes para procesar a Carlos por pertenenza a unha suposta organización terrorista en Galicia inexistente –pois a día de hoxe ningunha sentenza en firme xudicial considerou que exista tal banda e o propio fiscal considera que o existente na causa de Carlos aportado pola Garda Civil é insuficiente- e que non hai motivos para negar a súa posta en liberdade nin tampouco para que este tema siga sendo tratado pola Audiencia Nacional".
Cando tanto Carlos como o seu avogado, estaban agardando a que a Audiencia Nacional resolvera o recurso presentado, o xuíz anuncioulle a súa imputación nunha nova causa correspondente a un expediente que leva anos parado na AN por non ter probas sobre a autoría duns feitos acontecidos en Vigo en outubro do 2011, relativos á colocación dun explosivo nun caixero de Nova Caixa Galicia que os Tedax explosionaron controladamente.
Os seus avogados denuncian que "precisamente agora, cando non hai motivo algún para retrasar a inmediata posta en liberdade de Carlos, a Audiencia Nacional decide imputarlle esta nova causa co obxectivo de intentar que iso conste como un inventado antecedente de Carlos que nunca tivo e que é totalmente falso, e así atrancar a súa liberdade. Algo que aconteceu, para máis gravidade, negándolle o seu dereito á defensa ao ter que ser asistido por unha avogada de oficio en lugar de polo seu propio avogado de confianza".
A Rede de Apoio a Carlos Calvo afirma que "a policía e a Audiencia Nacional non poden aproveitarse de que Carlos leva inxustamente 6 meses en prisión preventiva sen motivos para cargarlle inventadamente a suposta autoría doutras causas que levan anos sen resolver por non ter probas nin as investigacións concluír nada determinante sobre quen está detrás deses feitos".
