Feijóo responsabiliza os Concellos do deterioro do Camiño de Santiago

Feijóo na súa comparecencia posterior ao Consello da Xunta Dominio Público Xoán Crespo, Xunta de Galicia

“Por que os concellos non coidan o Camiño que pasa polo seu termo municipal?”. A pregunta formulouna este xoves o presidente da Xunta, Alberto Núñez Feijóo, en resposta a outra que o cuestionaba sobre a denuncia que veñen de presentar varias entidades culturais de Lugo ante a Unesco contra a Xunta polas transformacións que están a sufrir os camiños Primitivo e do Norte.

O presidente pon Santiago como exemplo de municipio que ao seu ver non está a coidar dos camiños

Feijóo lembrou que “os tramos dos camiños de Santiago son competencia municipal” e que a Xunta limítase a axudalos economicamente a través de convenios ou a executar as obras no seu nome. O presidente asegurou que hai “moitos concellos” que non están a exercer a súa competencia e que “un deles é o Concello de Santiago”. Porén, a denuncia agora formulada ante a Unesco, supervisora do Patrimonio da Humanidade, como son os camiños de Santiago, non pon o foco sobre o que non se fai senón sobre o que se fai. As entidades denunciantes piden manter “a fisionomía tradicional dos vellos camiños históricos de peregrinación” e evitar a “construción de sendeiros ex novo con maquinaria pesada”, como din que está a suceder na Fonsagrada e Castroverde.

A Feijóo tamén se lle preguntou a que se debe o maior peso na xestión dos camiños de Santiago que está a asumir o departamento autonómico de Turismo fronte ao de Patrimonio. O presidente asegurou que todas as obras son “supervisadas pola Dirección Xeral de Patrimonio” e que esta mesmo paralizou actuacións impulsadas polo departamento de Turismo, como exemplificou cunha obra no Camiño Real no concello ourensán de Monterrei.

Treito do Camiño Primitivo na Fonsagrada, no que a Xunta realizou obras © Foro do Camiño
Imaxes achegadas polo Foro ao Icomos para amosar o impacto das obras © Foro do Camiño

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.