Dende hai dous anos, os grupos nacionais pertencentes á rede Amigos da Terra Europa reúnense nunha xuntanza anual de formación, denominada Get Moving. Ao longo desta semana representantes de 16 agrupacións levarán a cabo no centro de Educación Ambiental As Corcerizas (Serra de San Mamede, Ourense) unha serie de actividades de formación sobre mobilización social e activismo. Dende Amigos da Terra sinalan que "no contexto de crise social e ambiental no que nos atopamos inmersos, o fortalecemento do traballo en rede dos movementos sociais é clave para construíren alternativas que promovan a xustiza ambiental e o interese xeral".
As iniciativas sociais respectuosas co noso entorno "están a xerar un movemento alternativo progresivamente máis sólido e numeroso, baseado na solidariedade, a xustiza social e ambiental"
Salientan que as iniciativas sociais respectuosas co noso entorno "están a coller máis forza que nunca" pois as cooperativas de intercambio de produtos e servizos, de produción e consumo de alimentos, asi coma as plataformas cidadás por un novo modelo enerxético, por outro modelo de xestión dos recursos naturais e os residuos, entre outros proxectos, "están a xerar un movemento alternativo progresivamente máis sólido e numeroso, baseado na solidariedade, a xustiza social e ambiental". Por este motivo sinalan que “a situación actual fai preciso que as organizacións sociais tradicionais reflexionen sobre o seu rol na sociedade".
