Despece

• Beiras: "Os incendios son como se o Prestige se repetise cada ano"

  O portavoz de Alternativa Galega de Esquerda (AGE), Xosé Manuel Beiras, denunciou que os incendios forestais son “unha desfeita ecolóxica recorrente que o poder autonómico ignorou sistematicamente”. “É como se a catástrofe do Prestige se repetise cada ano e que os sucesivos Gobernos da Xunta non tomasen ningunha medida estratéxica, de longo alcance, ao respecto”, asegurou, antes de explicar a proposición non de lei do seu grupo parlamentario que recupera o Ditame da Comisión non permanente para estudio da problemática dos incendios forestais aprobado polo Parlamento en 1987.

  Trátase dun documento que recolle 47 medidas concretas contra a problemática dos lumes. “Entre outros asuntos, inclúe a necesidade de ‘conseguir que as accións preventivas teñan cada vez máis importancia”, sinalou Beiras, “algo que, como vimos este ano, en que os traballos preventivos comezaron en xullo, segue sen se cumprir”.

  AGE presenta unha proposición que recupera un plan aprobado en 1987 contra os incendios

  As maiorías absolutas de Fraga Iribarne deixaron ese acordo unánime nun caixón, denuncia AGE. “É un exemplo de como o PP trata o traballo da oposición, desprézao e ignórao, especialmente dende a chegada de Fraga Iribarne e até hoxe”, engadiu o portavoz de Alternativa, “e esquécese, cando se fala de alternativas, que no fondo dos arquivos deste Parlamento hai alternativas elaboradas pola oposición que nunca foron aceptadas polos gobernos do PP”. O caso do ditame de 1987 sobre os incendios non é este, xa que foi asinado por unanimidade na Cámara daquel ano.

  Pero AGE vai máis alá de rescatar ese documento histórico. A través do deputado Antón Sánchez, que acompañou a Beiras na comparecencia antes os medios de comunicación, presentou outra proposición non de lei con 13 medidas para “entrar no fondo da cuestión dos lumes, algo que pasa por fixar poboación no medio rural”. Segundo Sánchez, a actitude do señor Núñez diante dos incendios redúcese a “inventar unha frase lapidaria cada día para intentar desviar a atención e eludir as súas responsabilidades”. Logo de cinco anos seguidos de Goberno, o PP de Núñez non elaborou un diagnóstico serio sobre o que acontece nos montes galegos. “Se o 45% dos lumes do Estado español prenden en Galicia, a que se debe? O señor Núñez intentou sabelo? Que medidas tomou?”, pregúntase o deputado, quen ataca a actitude do presidente da Xunta e equipáraa cun ministro do Interior que achacase as causas dun aumento de delincuencia aos delincuentes.

  “O que acontece en Galicia non é casualidade”, estendeuse Antón Sánchez, “e ten que ver cun modelo forestal de baixa calidade ao servizo da industria pasteira ou cunha Xunta que non fai nada para impedir a reforestación ilegal de terras agrarias, xa denunciadas”.

  

• CxG presenta o seu pacto galego contra os incendios

  Compromiso por Galicia vén de presentar en diversas roldas de prensa realizadas ao longo do país as "liñas mestras" do Pacto galego para pór en valor o monte e loitar contra os lumes. As mesmas desenvolvéronse en Ourense, onde tomaron a palabra o coordinador territorial, Xosé Manuel Pérez Bouza, e Eduardo Carnero, concelleiro en Cualedro; en Boiro, onde acudiron a coordinadora da Coruña e concelleira en Muros, María Xosé Afonso e a secretaria xeral da Mocidade Nacionalista Galega, Balbina Gándara; e en Lalín, na que falaron Rafael Cuíña e o concelleiro Camilo Conde. Segundo Pérez Bouza, a valoración da campaña de extinción deste verán foi “moi negativa”, e se ben “a culpa dun incendio é de quen lle prende lume ao monte”, a responsabilidade de que ese lume sexa unha catástrofe é de aqueles que teñen as competencias en política forestal, “e aquí chámase Partido Popular e Alberto Núñez Feijóo”.

  Segundo o líder galeguista, a pesar de ter consumido miles de millóns de euros, antes co Infoga e agora co Pladiga, “levamos máis de 20 anos de continuos fracasos na loita contra o lume, derivados dunha mala política forestal, e unha ausencia total de labores de prevención e de iniciativas que poñan en valor o noso monte e o conxunto do medio rural”. A isto, segundo o ex senador, hai que engadirlle varios condicionantes, “como a desprofesionalización  e a privatización  do operativo de loita contra o lume, así coma a descoordinación que se introduciu nas últimas campañas por parte do Goberno da Xunta de Galicia, mesmo chegando a casos de apagar un lume con medios pertencentes a 12 administracións”.

  Para o coordinador territorial de Ourense, a solución non pasa só por incrementar as medidas represivas contra os que prenden lumes, ou instar aos veciños “a que fagan de policía”, senón que cómpre medidas de máis calado, “un pacto no que deben estar as comunidades de montes, os partidos políticos, organizacións agrarias,  grupos ecoloxistas, profesionais do sector forestal ou a industria”. e que debe estar reflectido nunha Lei aprobada por consenso no Parlamento de Galicia.

  CxG presenta un pacto para implicar a "comunidades de montes, partidos, organizacóns agrarias, ecoloxistas e profesionais forestais e a industria"

  Segundo Compromiso por Galicia, ese pacto debería recoller a reestruturación do terreo forestal,  reducindo o número de parcelas actuais, co obxectivo de que a súa explotación poida ser rendible; a ordenación do territorio definindo a que tipo de actividade se adican os diferentes espazos; modificación do enfoque dos traballos do operativo de loita contra o lume e de política forestal; profesionalización do operativo, que debe ser público, con un número estable de efectivos ao longo do ano, e ter un mando único, para evitar a descoordinación; posta en marcha de proxectos singulares que poñan en valor o monte e de medidas que permitan que se poidan por en produción as terras agrarias abandonadas; ou aumentar a concienciación da cidadanía, facéndolle ver a importancia de evitar queimar o noso territorio

  Para finalizar, Xosé Manuel Pérez Bouza indica que Compromiso faralle chegar a todos os actores implicados esta proposta de pacto galego para, dunha vez por todas, “sentarse a falar, deixar os intereses partidistas detrás e evitar a autodestrución do noso País”.