Pontevedra acollerá este sábado unha manifestación contra a organización de corridas de touros na cidade que se prevé histórica. A marcha, convocada pola plataforma Touradas fóra de Pontevedra, partirá ás 20 horas da praza da Peregrina, e espera superar amplamente as cifras de asistencia a mobilizacións semellantes, coma a realizada o pasado verán, que reuniu varios centos de persoas.
Será, de feito, o quinto ano consecutivo en que se realice esta manifestación, que nesta ocasión conta de momento cunha cifra de adhesións por parte de colectivos e entidades sociais moi superior ás dos anos precedentes. En total son máis de 70 os grupos (partidos políticos, asociacións e movementos sociais de todo tipo) que apoian a convocatoria en defensa dos dereitos dos animais e contra a barbarie taurina.
O obxectivo de Touradas fora de Pontevedra é asentarse definitivamente na cidade e continuar co traballo fóra da tempada de feira taurina así como fortalecer a súa estrutura
O obxectivo de Touradas fora de Pontevedra é asentarse definitivamente na cidade e continuar co traballo fóra da tempada de feira taurina así como fortalecer a súa estrutura. Hai unhas semanas a plataforma entregou unha petición no rexistro do Concello na que demandaba a declaración de Pontevedra como "Cidade Antitouradas e Amiga dos Animais". Ademais, propuña a reconversión do coso de San Roque, na actualidade en mans privadas, nun coliseo de uso cultural e social. Finalmente, solicitaba do Goberno municipal a súa implicación para erradicar este espectáculo e "o compromiso de non promocionar ningunha causa taurina".
De igual xeito, recentemente a plataforma Galicia, Mellor Sen Touradas convidou o Concello de Pontevedra a "deseñar unha axenda que supoña un proceso abolicionista dos eventos tauromáquicos que todavía teñen lugar na cidade nun recinto de titularidade privada". Ademais, o colectivo abolicionista advertiu tamén "do uso partidista que fai o Partido Popular da Deputación de Pontevedra, co uso dos fondos públicos para subsidiar a actividade de grupúsculos taurinos que chegaron a recibir cartos provinciais para organizar un encontro literario cun toureiro, ou financiar publicidade na propia praza de touros a través do Patronato de Turismo das Rías Baixas". Concluían que "esta clase de soporte económico público permite manter, de xeito artificioso, os festexos taurinos".