Milleiros de persoas manifestáronse este sábado en Monforte convocados pola Plataforma En Defensa da Sanidade Pública en defensa do hospital comarcal de Monforte e en contra da centralización da xestión sanitaria de toda a provincia en Lugo. A mobilización contou co apoio de toda a sociedade civil da comarca, dende as asociacións de empresarios até os sindicatos e de todos os partidos políticos agás o PP. Mesmo chegaron autobuses dende Chantada e outros concellos.
Entre os veciños e profesionais existe o temor de que o traslado da xestión á capital leve a medio prazo a un recorte nos servizos que se prestan no hospital comarcal e citan exemplos semellantes do Hospital do Barco ou do Salnés, que viron reducido o seu persoal ao depender de áreas sanitarias meirandes.
Entre os veciños e profesionais existe o temor de que o traslado da xestión á capital leve a medio prazo a un recorte nos servizos que se prestan no hospital comarcal
O pleno da corporación monfortina, reunido este venres en sesión extraordinaria e urxente, mostrara o seu rexeitamento, cos votos a favor de BNG e PSOE, a que a área sanitaria do sur lucense e o seu hospital comarcal pase a depender dunha xerencia centralizada en Lugo, tal e como anunciou a Xunta de Galicia. Nesa votación o PP quedou só na defensa da xestión sanitaria provincial. A moción partía da Plataforma en Defensa da Sanidade Pública, que acusaba o presidente da Xunta de incumprir o seu compromiso sobre a autonomía de xestión do hospital comarcal de Monforte. Os populares, pola súa banda, afirman que a xestión integrada no implica que Núñez Feijoo faltara á súa palabra pois “as tres áreas mantéñense, o que hai é unha fixación con Lugo”.
No pleno tomou a palabra a portavoz da plataforma en defensa da sanidade pública, Maribel García, que expuxo os temores de profesionais da sanidade e dos veciños e veciñas ante a posible perda de autonomía do hospital monfortino e do recorte de servizos.
A mobilización na comarca de Lemos repítese na outra área afectada pola centralización da xestión na capital provincial, A Mariña. Un manifesto recolleu xa máis de catro mil sinaturas contra a xestión integrada provincial. Os plans da Consellaría de Sanidade provocou a dimisión do xerente da área sanitaria que será substituido este luns por Francisco Antonio Soriano Paredes