O 8 de abril de 2003 morría José Couso a mans do exército de Estados Unidos de América. Nove anos despois, familiares e amigos seguen pedindo xustiza e a resolución dun caso con moitos puntos non explicados e #JusticiaparaCouso é trending topic en España e o vindeiro domingo está convocada unha concentración diante da Embaixada dos Estados Unidos en Madrid.
A familia non baixa os brazos e segue procurando o esclarecemento dun caso no que seguen a denunciar que o asasinato de Couso "enmárcase dentro do ataque realizado pola IIIª División de Infantería Acorazada a mañá do 8 de abril de 2003, contra todas as sedes onde se aloxaba a prensa independente (Al Jazeera, Abhu Dabi TV e o Hotel Palestina), que causou a morte dos xornalistas Tareq Ayoub, Taras Proysiuck e José Couso e feridas a unha vintena máis". O Pentágono recoñeceu a autoría do ataque alegando que os soldados que dispararon contra o hotel estaban respondendo a fogo inimigo.
A familia non baixa os brazos e segue procurando o esclarecemento do caso
A Asociación de irmáns, amigos e compañeiros de Couso traballa en impulsar a investigación sobre este caso e promove, xunto coa familia a querela que motiva a investigación xudicial que se está desenvolvendo na Audiencia Nacional e que "a pesar das trabas impostas por Goberno e Fiscalía", levou ao procesamento e posta en búsqueda e captura internacional do Tenente Coronel Philip DuCamp, do Capitán Phillip Wolford e do Sarxento Thomas Gibson, decidida polo xuíz Pedraz.
Como parte da filtración de documentos diplomáticos dos Estados Unidos realizada por WikiLeaks a finais de 2010 apareceron cabos da embaixada estadounidense en España que confirmarían as presións do embaixador Eduardo Aguirre e a connivencia do Goberno de José Luis Rodríguez Zapatero (nas figuras do fiscal xeral do Estado, Cándido Conde-Pumpido e o fiscal xefe da Audiencia Nacional, Javier Zaragoza) na ocultación de delictos e na colaboración coas autoridades estadounidenses para impedir a investigación do asasinato.
O vindeiro domingo, día 15, está convocada unha concentración "contra a impunidade e o esquecemento" diante da Embaixada dos Estados Unidos en Madrid
A sociedade tampouco esquece o caso, que cumpre un ano máis, e por exemplo este domingo pola mañá o hashtag #JusticiaparaCouso é trending topic en España. Ademais, o vindeiro domingo, día 15, está convocada unha concentración "contra a impunidade e o esquecemento" diante da Embaixada dos Estados Unidos en Madrid no que intervirán Maribel Permuy, Luis García Montero, Isaac Rosa, o cantautor Luis Ramiro, ou os traballadores de Público en loita.