A delegación do Parlamento Europeo percorreu este mércores a ría de Ferrol acompañada de representandes do Comité Cidadán de Emerxencia e das Confrarias. Os parlamentarios inspeccionaron in situ a instalación da planta de gas e a ensenada da Gándara. O Comité Cidadán valorou "positivamente" a visita, "a pesar dos anos transcorridos desde Novembro de 2001 cando una representación do CCE se despalzou a Bruselas" e entregoulle ao presidente da Comisión un dossier informativo a partir do que fará unha nova ampliación da denuncia ante a Comisión de Peticións, demandando o peche de Reganosa.

Fronte ás instalacións de planta de gas, os membros do CCE (Manuel Rodríguez Carballeira, coordinador, Luz Marina Torrente, da A. VV de Mehá, Humberto Fidalgo, de ADEGA, e Bernardo Bastida, ex patrón maior da Confraría de Ferrol) denunciaron "a situación de ilegalidade da planta tras a sentenza do Supremo, a perigosidade da mesma, a ameaza que supón para a cidadanía, o incumprimento de toda a lexislación medioambiental e de seguridade". Tamén lles expuxeron aos membros da delegación que a planta é "innecesaria", que a media de produción está sobre o 30%, e que ten un custe para os cidadáns de perto de 60 millóns de euros o ano.

O Comite Cidadán salienta que "os membros da Delegación quedaron abraiados ante o que viron, e mesmo na reunión chegaron a preguntar se non había alguén procesado diante de tal barbaridade, preguntaron polo tema da seguridade e como fora posible tamaño dislate, estando presente a delegación da Xunta de Galicia".