Son moitas as ocasións nas que se lles reclama aos e ás consumidoras dun produto ou servizo un determinada toma de conciencia e a toma de decisións coherentes cunha posición ideolóxica. Tamén no caso da lingua. Pero en poucos sectores coma o da atención telefónica o efecto dunha escolla lingüística pode ser tan importante.
As centrais de chamadas (ou call centers, contact centers...) optan cada vez máis pola deslocalización, sobre todo en América Latina, buscando manter a súa oferta de servizos con persoal que acepte salarios inferiores. En todo o Estado traballan unhas 80.000 persoas nestes servizos de telemarketing (8.000 en Galicia), pero nos últimos anos as empresas empresas españolas abriron delegacións no exterior que xa suman 25.000 empregados e empregadas. As cicateiras condicións salariais e laborais ofrecidas motivaron a convocatoria dunha folga xeral no sector.
A da Coruña é unha das oficinas máis importantes, cun total de 900 empregados e empregadas, que traballan en exclusiva para o servizo de atención ao cliente de Movistar, o coñecido como 1004
Extel, división de call center do grupo Adecco, anunciou hai uns días a presentación dun Expediente de Regulación de Emprego que -segundo se insinuou nos últimos días- afectaría á metade dos 3.000 traballadores e traballadoras que ten en España (en Hospitalet de Llobregat, A Coruña, Alcobendas, Málaga e Zaragoza), ficando fóra desta medida os centros que posúe en Lisboa e Arequipa (Perú), nos que traballan outras 3.000 persoas. A da Coruña é unha das oficinas máis importantes, cun total de 900 empregados e empregadas, que traballan en exclusiva para o servizo de atención ao cliente de Movistar, o coñecido como 1004.
Este martes, Extel negouse a recoñecer a parte social da mesa de mediación, polo que non comunicou o número exacto de despedimentos en cada centro e os motivos que xustificarían o ERE
Este martes ao mediodía tivo lugar en Madrid unha xuntanza de mediación á que acudiron representantes sindicais de todos os centros do Estado. Esta reunión supuña o inicio do período legal de consultas, de 30 días de duración, no que un equipo negociador en representación do persoal buscará deter o ERE ou cando menos limitar os seus efectos. Porén, a empresa negouse a recoñecer a parte social da mesa, aludindo á falta de acordo para a composición dese equipo negociador (CIG e USO estaban empatados para ocupar a derradeira praza, e a empresa non aceptou que se incorporasen os dous sindicatos). En consecuencia, a compañía negouse a informar sobre o número exacto de traballadores/as afectados/as en cada centro e sobre os motivos que xustificarían a presentación do ERE. En principio, comunicarallo este mércores á autoridade laboral competente.
Hai dúas semanas o pleno da Coruña aprobou por unanimidade unha moción, presentada polo BNG, reivindicando unhas condicións "máis xustas para o sector" e denunciando as "presións empresariais, sancións, vexacións ao persoal e reducións nas condicións laborais". Ademais, demandábase "a posta en marcha de campañas de sensibilización para que a xente saiba que pode ser atendida en galego, dotando de persoal suficiente para cubrir os servizos na nosa lingua, e colaborando así con que non se perdan empregos en Galicia e que non se deslocalicen postos de traballo". "Mentres o sector crece e ten máis beneficios ca nunca, cada vez máis servizos se externalizan e se abaratan pola vía da subcontratación", engadía a moción, concluíndo que "as condicións das traballadoras empeoran para adaptarse á consecuencia".
A agrupación da CIG en Extel iniciou unha campaña para que os e as usuarias de Galicia do servizo de atención telefónica de Movistar reclamen ser atendidos e atendidas en galego
Nos últimos días, unha vez que se coñeceu a intención da empresa de presentar o ERE, a agrupación da CIG en Extel iniciou unha campaña para que os e as usuarias de Galicia do servizo de atención telefónica de Movistar reclamen ser atendidos e atendidas en galego, un servizo que ofrece a compañía e que, destacan, axudaría a manter o centro de traballo e as prazas existentes na Coruña, limitando as posibilidades de deslocalizalos a outros territorios. Lembran que o telemarketing non é en absoluto un sector en crise, senón que pola contra as distintas empresas que se ocupan da atención telefónica obteñen nestes momento importantes beneficios.
