O pasado mes de setembro representantes de cooperativas e proxectos sociais de Italia, Estonia, Croacia, Holanda, Grecia e de distintos puntos do Estado español participaron en Vigo no II Encontro Europeo de Prácticas Cooperativas Cidadás, no que durante dous días se debateu a situación, problemas e potencialidades deste tipo de iniciativas, nun espazo no que tamén amosaron a súa experiencia ao redor dunha vintena de proxectos galegos.
O encontro de Vigo era o evento central dun proceso desenvolvido ao longo de varios meses en distintos países do continente para mellorar as estratexias políticas e sociais para o desenvolvemento das prácticas cooperativas. O obxectivo final era reflectir as conclusión destes debates e traballos preparatorios nunha serie de documentos que recollesen unha sistematización de demandas, problemas e solucións para as cooperativas.
Os días 5 e 6 de noviembre de 2014, unha delegación cidadá (composta por representantes dos seís países participantes) viaxou a Bruxelas para presentar os resultados do encontro vigués ante os e as europarlamentarias que aceptaron o convite, nun debate público con organizacións da sociedade civil radicadas na cidade belga. Estas conclusións sistematizáronse en dous documentos: unha Carta pola cooperación social en Europa e unhas Recomendacións para a promoción da cooperación cidadá en Europa. Tamén elaboraron unha wiki participativa que pode achegar moitos contidos e ferramentas de interese para as cooperativas.
Rita Bouvy, responsable de comunicación de Cooperland, destacaba que "o proxecto parte dunha constatación: que as prácticas cooperativas cidadás xeran benestar social" e sinalaba que "no actual momento de crise, as prácticas cooperativas non só están crecendo, senón que se están modernizando e diversificando, xerando prácticas que antes non existían". Con todo, advirten que a cooperación entre os diferentes axentes sociais se enfronta na actualidade a varios tipos de obstáculos (legais, de interlocución coas institucións, etc.), o que os levou a tentar afianzar a promoción destas prácticas non só desde a área social senón tamén a escala política.
O proxecto busca introducir na axenda europea a necesidade de que se recoñeza "o gran valor social que teñen as prácticas cooperativas". Esperan aumentar o coñecemento e a comprensión dos actores políticos e sociais capaces de xerar impacto sobre o potencial da cooperación dos cidadáns e compartir unha folla de ruta común coas estratexias prioritarias para logralo.
Recomendacións
O proxecto busca introducir na axenda europea a necesidade de que se recoñeza "o gran valor social que teñen as prácticas cooperativas"
O documento de recomendacións chama a "outorgar o recoñecemento apropiado ao valor social das prácticas de cooperación cidadá, á súa existencia e diversidade, fomentar o seu desenvolvemento e brindar o apoio necesario para a consolidación das numerosas e pequenas prácticas de cooperación social a través de novas canles institucionais, estatutos xurídicos e vías de financiamento". Pon o foco, sobre todo, en catro áreas temáticas: Cultura libre e cultura dixital, espazos públicos e sociais, medioambiente e espazos naturais e o ámbito da reprodución e os coidados, ampliando o concepto de benestar e aplicando medidas e ferramentas de conciliación.
Pon o foco, sobre todo, en catro áreas temáticas: Cultura libre e cultura dixital, espazos públicos e sociais, medioambiente e espazos naturais e o ámbito da reprodución e os coidados
Tamén chama a impulsar a interacción e a comunicación entre as prácticas de cooperación social: conectando e construíndo comunidades de afectados, conectando contornas produtivas e afinidades colectivas, apoiando iniciativas que produzan o contaxio de experiencias, construíndo ferramentas para compartir saberes e creando de redes de intercambio mutuo. Igualmente, pide simplificar e transformar os protocolos institucionais e da lexislación vixente para que sexan máis permeables ás iniciativas cidadás.
Finalmente, propón "salvar as distancias entre as institucións e as prácticas", instituíndo mecanismos de relación directa dos cidadáns coa UE e os gobernos locais. Así mesmo, demanda promover o desenvolvemento comunitario, outorgando o recoñecemento, os espazos e o financiamento necesarios para as prácticas de cooperación sociais, dándolle carácter de infraestrutura de valor social ás prácticas cooperativas cidadás arraigadas nos contextos locais.
