“Reivindicamos un Orgullo comunitario, feito desde abaixo: Cultura cuir, divulgación, educación en diversidade, visibilidade das realidades trans, racializadas, migrantes e non normativas. Porque, sen memoria ou mobilización, non pode haber avance”, salienta a asociación ALAS A Coruña no seu manifesto deste Orgullo 2025.
“Non podemos permitir que o Orgullo sexa tratado como unha festa cando a nosa comunidade aínda está a sufrir violencia e discriminación e, por enriba de todo, non podemos permitir que sexa unicamente unha oportunidade de negocio para uns poucos, que acadan beneficios de xeito pouco ético e transparente, a costa dos fondos públicos. Unha festa sen reivindicación non é un orgullo, é só un festival. Por todo iso, exiximos que eses recursos públicos sexan destinados a poñer en marcha políticas públicas que protexan e empoderen ás comunidades máis vulnerables, como é a nosa”, agregan desde o colectivo coruñés, que convocou a manifestación este sábado baixo o lema 20 anos avanzando en dereitos: Alén das grandes cidades.
Ademais da manifestación da Coruña, Avante LGBT+ convocou este sábado mobilizacións en Vigo, Pontevedra, Santiago, Lugo e Ferrol. O colectivo decidiu homenaxear en Compostela ao artista Xosé Vizoso, finado este ano. Olivia Meijide deseñou o cartaz da asociación representando as dúas Marías, as irmás Fandiño Ricart.
O Orgullo deste ano está marcado polo vixésimo aniversario da aprobación polo Congreso dos Deputados da reforma do Código Civil que eliminou a prohibición de casar entre persoas do mesmo sexo.
En Ames tamén se reuniron este sábado polo Día do Orgullo e a corporación municipal deu lectura a un manifesto co foco en que “no ano 2025 intensificouse notablemente a violencia e o odio contra a comunidade LGTBIQ+ en España, cunha crecente normalización de discursos discriminatorios que se traducen en agresións concretas. As cifras evidencian a urxencia dunha actuación institucional e social para protexer este colectivo e garantir unha convivencia libre de odio”.
Ademais entregóuselle o premio á gañadora do concurso fotográfico LGBT, que se enmarca na campaña municipal Ames a quen ames faino con orgullo, que foi para Paula Castiñeira Olveira, veciña do Milladoiro. Durante a mañá do sábado houbo obradoiros de pintura de bolsas e pedras, talleres de pulseiras e para elaborar espetadas de lambonadas.
Ribeira celebrou o Día do Orgullo cun acto institucional cos membros da corporación municipal e representantes de asociacións locais; as Amas de Casa, Mulleres en Acción, Renacer, Cruz Vermella e a Cofradía da Dorna. O pregoeiro deste ano, Rafa Moraña, repasou a súa infancia na vila do Barbanza como un neno xordo. Moraña invitou a reflexionar sobre o que significa para unha persoa con xordeira estar dentro do colectivo LGBT na súa vida cotiá e salientou que unha das vantaxes é que están á marxe dos discursos de odio, da falta de empatía e de respecto que viven as persoas oíntes.
En Soutomaior iniciaron o Día do Orgullo cunha andaina na que participaron máis de 50 persoas e que saíu do peirao, continuando pola Illa de Medal, Salinas do Ulló para rematar de novo no punto de inicio onde as persoas
participantes puideron desfrutar dun Mari Picnic. O Concello de Soutomaior organizou toda unha xornada de convivio na Carballeda do peirao de Arcade que rematou coa música en directo de Meiga-I e The Tetas' Van.
