Ao redor de dúas mil persoas manifestáronse este xoves pola máñá polas rúas de Ferrol nas proximidades da sede do PP e do Concello, moi protexido pola policía. As razóns, as mesmas dos últimos meses: reclamar carga de traballo para un sector que esmorece, os máis de dous milleiros de empregos destruídos nos últimos 18 meses e unha morea de promesas incumpridas.
A finais deste ano entregarase o único buque que queda en construción en Navantia, o LHD encargado por Australia, pero os traballos xa se finalizarán meses antes. Os traballadores volveron censurar a falta de avances nos trámites para a construción do dique flotante, así como nos prometidos floteis cos que o presidente da Xunta, Alberto Núñez Feijóo, encheu de promesas a campaña das últimas eleccións autonómicas.
Ao final da marcha, na que a forte chuvia estivo presente en todo momento, plantáronlle lume a dous bonecos coas caretas do presidente da Xunta e do alcalde da cidade. Estas figuras encabezaron en todo momento a manifestación, cunha corda ao pescozo, e senllos cartaces nos que se podía ler "dique, culpable" e "flotel, culpable". Consumidas as lapas, a marcha disolveuse.
