Trinta colectivos veñen de presentan un manifesto de solidariedade con Eduardo Vigo, Roberto Rodrigues, Maria Ossório e Antom Santos, que os vindeiros dias 24 e 25 de xuño serán xulgados na Audiencia Nacional de Madrid polo delicto de pertenza á suposta organización terrorista Resistencia Galega. O texto está asinado por ao redor de trinta entidades, entre as que se atopan partidos políticos (FPG, NÓS-Unidade Popular, Causa Galiza, Movemento pola Base...), sindicatos (CUT, CNT, CIG-Servizos...), organizacións xuvenís (Adiante, AMI, Galiza Nova...), centros sociais e outros movementos.

O manifesto alerta da posibilidade "de que este tribunal ditamine nese xuízo a existencia dunha organización terrorista en Galiza" e sinala que "a formalización xurídica da existencia desta suposta organización é unha estrataxema do Estado para abrir as portas á criminalización do soberanismo, facilitando detencións, ilegalizacións e o agravamento do xa de por si agudo déficit democrático que suportamos". Tamén denuncia que "a Audiencia Nacional responde a directrices políticas e carece das mínimas garantías xurídicas esixíbeis, como xa denunciaron organizacións de dereitos humanos e instancias internacionais".

De igual xeito o texto sinala "a excepcionalidade xurídica a que están sometidos" os acusados, "presos sen se celebrar o seu xuízo desde hai ano e medio e dispersados a centos de quilómetros dos seus lugares de residencia" e expresa a "solidariedade e afecto aos familiares dos independentistas presos".