Un novo asasinato machista. Este luns un home acabou coa vida da súa dona no Porriño, Magdalena Moreira Alonso, de 47 anos. O matrimonio iniciara o seu proceso de separación hai dúas semanas. O home, de 57 anos, marchou do traballo ao redor da mañá asegurando que estaba citado coa súa muller para asinar o seu divorcio. Cando o fillo máis vello da parella chegou a casa ao mediodía atopou os cadáveres de ambos os dous. A policía sospeita que cando a muller viu o seu marido armado cunha escopeta tentou fuxir, recibindo un disparo polas costas. Posteriormente, o asasino suicidouse.
Trátase da primeira muller asasinada por violencia de xénero no que levamos de ano en Galicia e a primeira dende febreiro do pasado ano. É a 17ª no conxunto do Estado español neste ano 2018. Como xa é habitual, o movemento feminista galego convoca concentracións de protesta ao día seguinte da publicación das novas do asasinato. Así, este mércores están xa convocadas máis dunha vintena de actos en cidades e vilas de toda Galicia. "Estamos fartas de ser asasinadas. Querémonos vivas!", destácase nos chamamentos. Estas son as convocatorias:
- Cangas, 12:30 Praza do Concello
- O Porriño, 20.30h Praza do Concello
- Ourense, 20h na Castañeira
- Lugo, 20h diante do Concello
- A Coruña, 20h no Obelisco
- Vigo, 20h no MARCO
- Compostela, 20h Praza 8 Marzo
- A Estrada, 20h diante do Concello
- Ferrol, 20h diante do Concello
- Pontevedra, 20h audiencia provincial
- Redondela, 20.30h praza da Constitución
- As Pontes, 20h Praza do Hospital
- Foz, 20h diante do Concello
- Ribeira, 21h Praza do Concello
- Viveiro, 20h Praza da Fontenova
- Sarria 20h Praza do Concello
- Redondela, 20:30 Praza da Constitución
- Ames 20:30 Praza da Mahia
- Carballo, 20h diante do Concello
- Viana do Bolo, 20h Praza Maior
- Monforte, 20.30h Praza de España
- A Ramallosa (Nigrán). 20h Rotonda da Ramallosa
- Miño, sábado 23 ás 12 na Praza do Parchís