Varias concentracións protestarán pola brutal agresión homófoba en Santiago

O primeiro ataque tivo lugar na rúa Galeras © Google Maps

Compostela e A Coruña acollerán nos vindeiros mobilizacións de protesta contra a agresión homófoba que o pasado luns sufriu unha parella en Santiago, un acto que chamou a atención pola súa brutalidade e pola aparente sensación de impunidade coa que actuaron os dous agresores. Na Coruña o acto terá lugar o sábado e en Compostela as entidades que denunciaron o sucedido, como Ultreia, aínda non fixaron unha data exacta.

"Sidoso de merda, espero que non me contaxies nada", espetou o atacante

Ao redor das nove da noite A.R. dirixiuse co seu can a un supermercado situado na Rúa Galeras. Aínda que a súa primeira intención fora a de deixalo atado na porta, a presenza doutro animal impediullo. A.R. entrou daquela na tenda, para preguntar de quen era o can. De inmediato, e sen mediar máis conversa, un home comezou a insultalo, a ameazalo e a chamarlle "maricón". A.R tiroulle unha foto co móbil co obxectivo de denuncialo, o que tivo como resposta que o agresor, que estaba acompañado por un amigo, lle pegase dúas puñadas na cara, facéndolle sangue. "Sidoso de merda, espero que non me contaxies nada", engadiu o atacante.

A.R. chamou a Policía e tamén o seu marido R.B, que se achegou de inmediato ata o supermercado, onde tamén recibiu insultos homófobos por parte dos agresores, de 40 e 50 anos, que foron identificados pola policía. O matrimonio dirixiuse en ambulancia ata Urxencias, para que A.R. fose atendido das feridas. Alí, mentres fumaban na porta, descubriron que os agresores os seguiran ata o hospital. Volveron insultalos e a reclamarlles que lles desen a foto que lles fixeran nun primeiro momento, con tal violencia que mesmo tivo que intervir a seguridade privada do centro hospitalario e o persoal sanitario, que permitiu que a parella se refuxiase nunha das consultas, dende onde chamaron de novo á policía.

O matrimonio dirixiuse en ambulancia ata Urxencias, para que A.R. fose atendido das feridas. Alí, mentres fumaban na porta, descubriron que os agresores os seguiran ata o hospital

R.B. e A.R. abandonaron o lugar en taxi e "practicamente escoltados", ante a aparente inacción dos axentes policiais, que non semellaban apreciar unha ameaza na actitude dos atacantes. Dende alí o matrimonio dirixiuse directamente á comisaría, para denunciar os feitos, constatando con tristura que ningunha das persoas que fora testemuña das agresións os quixo acompañar. A denuncia consta como un "delito de violencia contra a liberdade sexual" e así será investigada.

 

"Desprotección" ante as agresións

As entidades de defensa do colectivo LGTBI denuncian ante os feitos que tiveron lugar este luns en Compostela que "as persoas LGTBI non están protexidas”, como sinala Noel Dopazo, coordinador da Área de Diversidade Afectivo-Sexual de Esquerda Unida (ALEAS-EU). Segundo Dopazo “queda moito por facer, mais as políticas LGTBI non están sobre a mesa. As institucións teñen que poñerse mans á obra e, ademais de xestos simbólicos, o colectivo LGTBI necesita políticas para garantir a súa seguridade e poder ter unha vida digna”. De igual xeito, ALAS-Coruña pide "unha lei que castigue" estes tipo de feitos e "non só os condene".

As entidades de defensa do colectivo LGTBI denuncian ante os feitos que tiveron lugar este luns en Compostela que "as persoas LGTBI non están protexidas”

O pasado mes de xullo o Valedor do Pobo alertou de que a maior parte dos casos de LGTBIfobia "non se denuncian", destacando que no que levaban de 2015 recibira "menos de dez queixas concretas e específicas" procedentes deste colectivo por situacións nas que os seus dereitos foron vulnerado.

Varias das entidades LGBTI amósanse críticas coa Lei de Igualdade de Trato e non Discriminación de persoas LGTBI en Galicia, que ALEAS cualificou como "unha campaña publicitaria que quedou en papel mollado”. A Asociación Nós Mesmas criticara que as emendas presentadas polo PP "baleiraran de contido" a norma, pois eliminaran todo o capítulo de sancións, que no anteproxecto prevía multas de entre 150 euros até medio millón de euros para as infraccións máis graves, e suprimira tamén os protocolos de actuación ante agresións.

O primeiro ataque tivo lugar na rúa Galeras © Google Maps

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.