A entidade Véspera de Nada presentoulles este venres ás distintas forzas políticas un documento (Por unha Galiza resiliente: Preparando Galiza para unha nova civilización) que inclúe un amplo conxunto de medidas para preparar o futuro dun país sen combustibles fósiles. Trátase dun plan estratéxico trasversal que afecta de maneira directa ou indirecta a todas as áreas de competencia da Xunta.
A asociación considera que "é moita hora de que o noso país comece a reconstruír resiliencia para sermos capaces de sobrevivir como país e como sociedade co menor sufrimento posible os duros tempos nos que nos adentramos". Salienta que as medidas (en administración pública, economía, educación, agricultura, transporte, fiscalidade, hábitat ou urbanismo) non conforman "un documento de área, para ser abordado parcialmente dentro do ámbito de Medio Ambiente nos partidos políticos galegos, senón un plan estratéxico integral, xa que o declive enerxético e a necesidade de construírmos resiliencia como país, non pode ser abordada de maneira illada".
Véspera de Nada ofreceu documentos semellantes nas eleccións galegas de 2012, municipais de 2011 e 2015 e europeas de 2014, que se presentan agora máis extensos e desenvolvidos.