UGT, CCOO, CIG, CNT e CUT veñen de asinar un manifesto que pide establecer medidas de presión e evitar as relacións económicas, políticas e empresariais con este Estado por vulnerar o Dereito Internacional e incumprir as resolucións da ONU. Apoian deste xeito a campaña mundial de Boicot, Desinvestimentos e Sancións (BDS) a Israel, na que se denuncian as violacións e asedio que padece o pobo palestino.

O manifesto esixe a finalización da ocupación militar de Palestina, a paralización e destrución do muro de Cisxordania, a fin do sistema de discriminación racial, o levantamento total e definitivo do bloqueo a Gaza e o recoñecemento do dereito ao retorno para as persoas refuxiadas

O manifesto esixe a finalización da ocupación militar de Palestina, a paralización e destrución do muro de Cisxordania, a fin do sistema de discriminación racial, o levantamento total e definitivo do bloqueo a Gaza e o recoñecemento do dereito ao retorno para as persoas refuxiadas. Os sindicatos comprométense a denunciar publicamente todas aquelas institucións e empresas galega "que nas súas actuacións antepoñan intereses económicos, políticos ou doutra índole aos dereitos do pobo palestino e colaboren ou lexitimen coa ocupación colonial de Palestina".

O texto afirma que "o brutal asedio de Israel a Gaza representa hoxe a máis crítica e urxente de todas as inxustizas israelís contra o pobo palestino que se manifesta en forma de innumerábeis violacións aos Dereitos Humanos e o Dereito Internacional Humanitario". E lembra as palabras de Nelson Mandela, que dixo que a xustiza para o pobo palestino se converteuse  no “meirande caso moral do noso tempo”. Ademais, denuncia a actitude da Unión Europea e os seus estados membros, "que permanecen impasíbeis ante a reiterada vulneración dos dereitos humanos, cívicos e políticos da poboación árabe de Palestina".

O manifesto denuncia a actitude da Unión Europea e os seus estados membros, "que permanecen impasíbeis ante a reiterada vulneración dos dereitos humanos, cívicos e políticos da poboación árabe de Palestina"

A campaña de Boicot, Desinvestimentos e Sancións (BDS) é unha iniciativa pacífica liderada desde 2005 por organizacións da sociedade civil, partidos políticos e sindicatos que representan a poboación palestina, e que está apoiada por unha rede mundial de entidades que compoñen o movemento de solidariedade co pobo palestino. A campaña fai un chamamento mundial a establecer medidas de presión contra Israel e evitar as relacións económicas, políticas e empresariais con este Estado e demanda ao mundo enteiro que boicotee Israel, as súas institucións e as súas empresas, e tamén que retire os seus investimentos nas empresas que se benefician da ocupación ou da negación dos dereitos da poboación refuxiada.