A Xunta desenténdese dos aeroportos tras gastar 30.000 euros nun plan para coordinalos

Referencias aos aeroportos no programa do PPdeG CC-BY-SA Praza Pública

O 21 de maio de 2013 constituíase en Santiago o Comité de Coordinación Aeroportuaria, un órgano auspiciado polo Ministerio de Fomento que, participado tamén por concellos e a Xunta, presentábase como a vía para aprobar a gran materia pendente de harmonizar as tres terminais galegas, toda vez que as principais forzas políticas manteñen fóra da axenda a posibilidade de suprimir algunha delas. Ese mesmo día o Goberno galego iniciaba os trámites para contratar a elaboración dun "plan estratéxico do sistema aeroportuario galego", cuxa compra formalizou en xullo por case 30.000 euros. Un ano despois, o Executivo que preside Alberto Núñez Feijóo desenténdese desa coordinación por boca do propio presidente.

A elaboración dese estudo, encargada mentres Fomento traballaba noutro de semellantes características, supuxo o cumprimento dunha promesa electoral dos conservadores, que no seu programa electoral de 2012 prometeron traballar para o "funcionamento conxunto e coordinado dos tres aeroportos de Galicia". A compra, canalizada a través da axencia Turismo de Galicia, xustificábase como unha vía para "garantir a viabilidade do sistema aeroportuario a base dunha operación coordinada" de Lavacolla, Alvedro e Peinador. O propio Feijóo defendeu daquela a contratación a preguntas da prensa argumentando que o seu Goberno precisaba "formarse" e "informarse" antes de participar no devandito Comité: "Parece razoable que se alguén forma parte dunha comisión leve formación especializada ao respecto", sinalaba.

Aeroporto de Lavacolla © Aena Aeropuertos

De xeito paralelo a eses movementos en San Caetano Fomento presentou o resultado da súa diagnose. O departamento de Ana Pastor propuña, a grandes trazos, manter un sistema aeroportuario 'a tres' no que, como "enfoque inicial", a terminal compostelá estivese centrada en voos turísticos internacionais mentres que A Coruña e Vigo se especializasen en viaxes de negocios, esencialmente dentro do Estado. "Cando teñamos ese documento ímolo estudar con moito detalle" e "en base a esa avaliación, faremos un pronunciamento e un posicionamento por escrito", dixo daquela Feijóo.

Declaracións mentres o tráfico cae

Todos estes cruzamentos de declaracións, estudos e xuntanzas, prodúcense nun contexto de caída continuada do tráfico de pasaxeiros nas tres terminais galegas, caída que no caso de Alvedro e Peinador comeza en 2007 e en Lavacolla, en 2011, ano no que o conxunto dos aeroportos galegos chegou aos 4,5 millóns de pasaxeiros mentres que o Sá Carneiro do Porto, principal competidor, superou el só os 5,3 millóns de persoas, segundo datos de Aeroportos de Portugal.

Tráfico aeroportuario en Galicia no primeiro semestre de 2014 CC-BY-SA Praza Pública

Aínda que os datos de Aena Aeropuertos correspondentes aos primeiros meses de 2014 falan dunha levísima recuperación -en xuño, por exemplo, as terminais galegas gañaron 26.000 pasaxeiros a respecto do ano anterior- se a fotografía se tira cunha maior perspectiva obsérvase que a caída é pronunciada e continuada, coa única excepción do discreto repunte da Coruña, que finalizou 2013 con 839.000 pasaxeiros mentres que rematara 2012 con 828.000. Lavacolla, pola súa banda, logrou o ano pasado 2,07 millóns de pasaxeiros (en 2011 tiña 2,5 millóns) e Peinador quedou nuns históricos, por baixos, 678.000 viaxeiros e viaxeiras.

Feijóo: "A competencia é do Goberno de España, que a exerza"

Neste contexto e mentres os aeroportos galegos ofrecen os billetes máis caros de todo o norte peninsular, Feijóo obvia o informe encargado polo seu propio Goberno e, a preguntas da prensa, asegura que a súa "proposta" é "coñecida" e non dende "hai trimestres", senón dende "hai anos, dende que chegamos en 2009". Ese "plantexamento", di, pasa pola "imprescindible coordinación dos aeroportos". "Pedímosllo ao ministro respectivo [José Blanco], dixo que os coordinaría el e non o fixo", o mesmo que "o actual Goberno da nación", cuxa ministra, Ana Pastor, "dixo tamén que asumiría a coordinación e teño que dicir que non están coordinados". A competencia, evidencia, "é do Goberno de España", polo tanto, "que a exerza", conclúe.

O Metro do Porto chegando ao Sá Carneiro © Aeroportos de Portugal

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.