A Xunta prevé ter o plan de atención á soidade dous anos despois de que o Parlamento pedise aprobalo "de maneira urxente"

Núñez Feijóo e Fabiola García, no acto sobre a Estratexia Estratexia galega de atención á soidade CC-BY-SA Xunta

O Parlamento aprobou hai case dous anos por unanimidade instar a Xunta a poñer en marcha "de maneira urxente" unha estratexia contra a soidade 

O plan da Xunta contra o problema da soidade non desexada de milleiros de persoas maiores en Galicia chegará, de cumprirse os prazos, dous anos despois de que o Parlamento instase a poñela en marcha de xeito "urxente" e catro meses máis tarde desde que o propio Goberno anunciou a súa inminente presentación. 

A finais de xuño de 2019, o pleno da Cámara galega aprobaba por unanimidade unha moción presentada polo grupo do PSdeG na que se exixía á Xunta a posta en marcha dunha Estratexia de prevención e atención á soidade non desexada en Galicia onde, segundo datos do INE, viven 126.000 persoas de máis de 65 anos que viven soas.  

Núñez Feijóo e Fabiola García, no acto sobre a Estratexia Estratexia galega de atención á soidade CC-BY-SA Xunta

Todos os partidos votaron a favor e apoiaron unha iniciativa que instaba tamén o Goberno galego a elaborar, durante aquela lexislatura xa rematada, "e en colaboración coa Fegamp, un informe que permita dimensionar o impacto do fenómeno da soidade en Galicia" no que se incluíse un censo de persoas maiores que viven soas. Logo, a Xunta --en colaboración cos concellos, o Executivo central e o terceiro sector-- debería "elaborar de maneira urxente" esa estratexia para "abordar de forma integral este fenómeno”.

Vinte e un meses despois, no pasado mes de marzo e xa noutra lexislatura, a conselleira de Política Social, Fabiola García, anunciou no Parlamento que en poucos días a Xunta presentaría esa Estratexia galega de atención á soidade non desexada, unha "iniciativa pioneira a nivel estatal". 

Feijóo anuncia agora unha mesa de traballo para "deseñar" a Estratexia galega de atención á soidade non desexada, que se prevé aprobar entre xuño e xullo

Neste luns, dous meses e medio despois do anuncio da conselleira, Feijóo avanzou a creación "dunha mesa de traballo cos concellos para deseñar" a devandita estratexia, "co obxectivo de poder aprobala entre xuño e xullo deste ano". Estaría lista, por fin, dous anos despois do acordo unánime do Parlamento que instaba a súa creación e entre tres e catro meses máis tarde da data que anunciara Fabiola García. 

O presidente da Xunta aclarou que esa mesa, encargada aínda de elaborar o plan, servirá para "analizar as medidas que están en marcha a nivel local, explorar vías de colaboración entre administracións e deseñar xuntos solucións novidosas”. 

Imaxe dunha muller maior en Galicia © Xunta

Durante unha xornada de traballo sobre este asunto, Feijóo recordou que esta estratexia, pioneira en toda España, identifica cinco liñas estratéxicas: a prevención, xa que é fundamental actuar antes de que o fenómeno apareza a través de iniciativas que favorezan as relacións sociais e a participación social ou cultural das persoas maiores; a detección e a intervención, respectando as preferencias e necesidades do maior para ofrecer o servizo que máis se axuste ás súas necesidades; e a visibilización e a cooperación, co fin de que a sociedade sexa consciente de que hai moitas persoas maiores que viven soas sen desexalo. 

Son as mesmas cinco liñas estratéxicas que a conselleira Fabiola García adiantara no Parlamento en marzo que, aclara agora Feijóo, teñen como obxectivo "que todos os maiores se sintan arroupados e que pague a pena o esforzo de converternos en pioneiros para coidalos”. 

Ademais, o presidente da Xunta asegurou que "moitos dos conceptos que guían esta iniciativa xa levan anos presentes nas políticas do Goberno galego" e citou programas como o voluntariado sénior, as casas do maior, o autobús de coidados porta a porta, o Xantar na Casa ou o Servizo de Axuda no Fogar.

Despece

  • O BNG pide a «xestión directa» das residencias públicas á Xunta, que defende que «non é a prioridade»

    CC-BY-NC-SA BNG

    "A prioridade non é de quen sexa a residencia, a titularidade do centro, senón coidar, mimar e atender da mellor forma posible a todas as persoas maiores". Así respondeu a conselleira de Política Social, Fabiola García, á demanda feita este luns polo BNG á Xunta para que asuma a "xestión directa" destes centros públicos nun acto fronte ao xeriátrico de DomusVi San Lázaro, en Compostela. 

    Fabiola García cre que "a prioridade non é de quen sexa a residencia, a titularidade do centro, senón coidar, mimar e atender da mellor forma posible"

    A portavoz nacional do BNG, Ana Pontón, criticou o modelo de residencias de maiores en Galicia por "fracasado" e por unhas carencias que, dixo, a COVID "destapou con toda a crueza". A líder do Bloque pediu á Xunta a "xestión directa" destes centros de titularidade pública que están en mans privadas. 

    O BNG presentou dúas iniciativas: por unha banda, reclamar que as sete futuras residencias proxectadas nas sete cidades sexan xestionadas directamente pola Xunta e, por outra, esa para que os centros de titularidade pública pero xestionadas de maneira privada pase, "unha vez rematen eses contratos", a unha dirección totalmente pública. 

    Pontón lembra que o actual modelo está "altamente privatizado" por empresas que se sitúan en "dous extremos": ou o do "negocio puro e duro" ou o da "caridade". No primeiro deles destacou que é "prestado por empresas controladas por fondos de capital que mesmo operan desde paraísos fiscais" e no outro, por entidades "vinculadas á Igrexa católica”.

    O BNG pide que as sete futuras residencias das cidades sexan públicas e que as públicas xestionadas de maneira privada viren a mans da Administración

    “DomusVi é un dos grandes xigantes dese modelo que fai negocio coa atención ás persoas maiores, propiedade dun fondo de capital británico, dun fondo dos Emiratos Árabes e dun multimillonario francés. E opera desde o paraíso fiscal da Illa de Jersey”, explicou Pontón. Ademais, e respecto da Fundación San Rosendo, destacou que está en mans do Bispado de Ourense ou que Hermanitas de los Ancianos Desamparados é dunha orde relixiosa fundada no século XIX. "Este é o modelo na Galiza do século XXI”, denunciou. 

    Para Pontón, "a atención ás persoas maiores non está en mans das Aadministracións publicas, senón de empresas que buscan facer negocio e de entidades de caridade asistencial". "Este modelo fracasado é o que o BNG quere cambiar, nin negocio puro e duro, nin caridade, o coidado das persoas maiores debe ser un servizo público”, alegou, para quen sería “inmoral” que despois do sucedido na pandemia se siga con este modelo “ou se leven a cabo simples cambios cosméticos”.

  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza