A Xunta ve "necesario" o gasto de 25 millóns en propaganda

Rueda responde á pregunta do BNG CC-BY-SA Praza Pública

O pasado maio unha resposta escrita da Xunta ao BNG permitía, por primeira vez, coñecer a través do propio Goberno unha cifra de gasto público en publicidade e propaganda institucional. Segundo o propio Executivo, a primeira lexislatura de Alberto Núñez Feijóo na Presidencia saldouse cun gasto de 25 millóns de euros en accións propagandísticas que, unha vez sumados os anuncios do Xacobeo 2010, chegaron aos 40 millóns de euros. A propia autora daquela pregunta, a nacionalista Tereixa Paz, cuestionou este martes o vicepresidente Alfonso Rueda, toda vez que, noutras respostas parlamentarias, "outros departamentos" da Xunta inclúen campañas "que non aparecen na relación dos 25 millóns". "Como estes gastos non estaban pídolle que nos diga a verdade", requeriu.

Lonxe de atender o cuestionamento do Bloque o número dous de Feijóo optou por obviar a pregunta e centrarse noutro treito da intervención de Paz, na que o instaba a aclarar se lle "aprece ético e moral recortar dereitos ata incorrer na ilegalidade" e, ao tempo, seguir "mantendo gastos de propaganda para facerlle autobombo ao seu Goberno". Para Rueda as estas campañas "eran necesarias", "antes e agora" e "cando estean xustificadas van seguir sendo necesarias". "Fixémolas e seguiranse facendo", advirte, toda vez que "nun momento de crise e dificultades orzamentarias" o Goberno xa "gasta menos cartos en publicidade institucional".

Tendo en conta o Xacobeo a Xunta gastou 40 millóns en anuncios entre 2009 e 2012

Aínda que a Secretaría Xeral de Medios emprega o termo "propaganda" na súa resposta escrita ao BNG Rueda advirte de que "nós entendemos que é publicidade institucional". "Propaganda" é o que "vostede di", dille a Paz, en cuxa opinión "os únicos gastos soportables" neste ámbito "mentres lles recortan á cidadanía até o aire que respira" son "aqueles imprescindibles para o mantemento dos servizos públicos, os procesos de contratación e os obrigados pola normativa europea", maís aínda cando, dende o seu punto de vista, a "utilidade" dalgunhas das campañas impulsadas pola Xunta é cuestionable".

Malia a asegurar non ter interese en emprender unha caste de "partido de tenis" no que Goberno e oposición se arroxasen acusacións de gasto publicitario, partido "no que eu levaría as de ganar", Rueda defende os "criterios obxectivos do que debe ser publicidade institucional", os cales, acusa, non se cumprían nas accións propagandísticas do bipartito. En síntese, resume o vicepresidente, a Xunta seguirá facendo anuncios cando os considere "necesarios" e aínda así, asegura, gasta "un 68% menos" que o Executivo de coalición.

Rueda responde á pregunta do BNG CC-BY-SA Praza Pública

Despece

  • Quintana nega que a 'barra libre' acuícola "acabe co litoral"

    O Plan Director de Acuicultura Litoral impulsado pola Xunta en 2012 permite instalar piscifactorías en calquera punto da costa galega aínda que causen danos. O proxecto, lanzado entre unha forte oposición política e ecoloxista, regresou este mércores ao Parlamento nunha pregunta da AGE que, a través do seu deputado Juan Fajardo, lamentou que as únicas "excepcións" que contempla este plan sexan, precisamente, os lugares "onde xa hai unha infraestruturas deste tipo". "É tremendamente perigoso desregular a costa co único obxectivo de permitirlles ás multinacionais que elixan en que lugar queren destrozar o territorio", censura. Para a conselleira do Mar isto non acontece.

    "Teño que negar a maior", di Rosa Quintana, quen non só rexeita a acusación da AGE de ser "unha plaga que quere destrozalo todo". "Non pretendemos acabar co noso litoral", di a titular de Mar, quen explica que no Goberno "somos da idea" de que a protección da costa é "compatible co desenvolvemento da acuicultura". "Non incumprimos ningunha norma", defende, ao tempo que salienta que o plan vai acompañado dun manual de integración paisaxística. "O apartado paisaxístico di que hai que pintar de verde os teitos das plantas, ese é o seu concepto", censura Fajardo. "Se quere vir aquí mentir, fágao", resolve a conselleira".

    Fajardo formúlalle a pregunta a Quintana CC-BY-SA Praza Pública

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza